नेपाली कम्युनिस्ट पार्टीको राष्ट्रिय सम्मेलनमा ९ बुँदे प्रस्ताव पारित

काठमाडौं-  नेपाली कम्युनिस्ट पार्टीको नवगठित राष्ट्रिय सम्मेलनले बुधबार भृकुटीमण्डपमा ९ बुँदे प्रस्ताव पारित गरेको छ।

सम्मेलनले पार्टीको नाम, चुनाव चिह्न र एकता सम्बन्धी अन्य विभिन्न प्रस्तावहरू अनुमोदन गरेको छ। वर्षमान पुन अनन्तले यी प्रस्तावहरू प्रतिनिधिहरू अघि पेश गरेपछि सहभागीहरूले ताली बजाएर अनुमोदन गरेका थिए।

उक्त सम्मेलनले घोषणापत्र र अन्तरिम विधान २०८२ पनि पारित गरेको छ। यससँगै नयाँ पार्टीको संरचना, नेतृत्व र कार्यक्रमसम्बन्धी रूपरेखा औपचारिक रूपमा तय भएको छ।

यी हुन् ९ बुँदे प्रस्ताव

१. एकता प्रक्रियामा सहभागी पार्टीहरूले पार्टी एकता गरेर ‘नेपाली कम्युनिष्ट पार्टी’ निर्माण गर्ने निर्णय गरिएको छ।

२. चुनाव चिह्न ‘पाँच कुने तारा’ राख्ने निर्णय गरिएको छ।

३. एकतामा सहभागी सबै सदस्यहरू अबदेखि नेपाली कम्युनिष्ट पार्टीका सदस्य हुने निर्णय गरिएको छ।

४. एकतामा सहभागी सबै पार्टीका नेताहरूसँग आवश्यक परामर्श गरेर पार्टीका केन्द्रीय संरचनाहरूलाई पूर्णता दिने र संगठनात्मक समायोजन सम्बन्धी काम गर्ने तथा यसअघि सबै घटकका केन्द्रीय समितिलाई समायोजन गरी केन्द्रीय समिति निर्माण गर्ने निर्णय गरिएको छ।

५. केन्द्रीय संरचनाहरूलाई पूर्णता दिने र संगठनात्मक समायोजनसम्बन्धी काम गर्ने अख्तियारी पार्टीका संयोजक र सहसंयोजकलाई दिने प्रस्ताव गरिएको छ।

६. विगतका प्रतिनिधिसभा, राष्ट्रिय सभा, प्रदेश सभा र स्थानीय तहमा नेकपा माओवादी केन्द्र, नेकपा एकीकृत समाजवादी, नेपाल समाजवादी पार्टी, नेकपा माओवादी समाजवादीको चुनाव चिह्नबाट निर्वाचित जनप्रतिनिधिहरू अबदेखि नेपाली कम्युनिष्ट पार्टीका जनप्रतिनिधि हुनेछन्।

७. पार्टी एकतामा सामेल सबै पार्टीहरूको चल–अचल, बैंक मौज्दातलगायतका सम्पत्तिको स्वामित्व र दायित्व अबदेखि नेपाली कम्युनिष्ट पार्टीको स्वामित्वमा रहनेछ।

८. नेपाली कम्युनिष्ट पार्टीको घोषणापत्र पारित गरिएको छ।

९. नेपाली कम्युनिष्ट पार्टीको विधान छलफल र आवश्यक सुझावसहित पारित गरिएको छ।