माधव नेपालमाथिको मुद्दाबारे देउवाको सोधपुछ, प्रचण्डले दिए चकित पार्ने जवाफ

काठमाडौं— पूर्वप्रधानमन्त्री माधवकुमार नेपालविरुद्ध भ्रष्टाचार मुद्दा दर्ता भएपछि नेपाली कांग्रेस सभापति शेरबहादुर देउवा र माओवादी केन्द्र अध्यक्ष पुष्पकमल दाहाल ‘प्रचण्ड’ बीच फोन संवाद भएको खुलासा भएको छ।

प्रचण्डका अनुसार नेकपा (एकीकृत समाजवादी) अध्यक्षसमेत रहेका नेपालविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेपछि देउवाले फोन गरेर सोधपुछ गरेका थिए।

‘देउवाजीले हिजो फोन गर्नुभएको थियो’, शुक्रबार पत्रकारहरूसँग कुरा गर्दै प्रचण्डले भने, ‘उहाँले माधव नेपालमाथि मुद्दा दर्ता भयो भन्ने सुनेर सोध्दै हुनुहुन्थ्यो, मैले पनि त्यसबारे आश्चर्य मानें।’

प्रचण्डले देउवालाई उल्टै भने, ‘तपाईंलाई पो थाहा हुनुपर्ने होइन र?’ तर कुराकानीको क्रममा देउवालाई पनि जानकारी नभएको बुझिएपछि प्रचण्डले निष्कर्ष निकाले, ‘देउवासँग सल्लाह गरेर मुद्दा दर्ता गरिएको होइन रहेछ।’

पूर्वप्रधानमन्त्री नेपालमाथि पतञ्जलि योगपीठ तथा आयुर्वेद कम्पनीलाई हदबन्दी छुटमा सरकारी जग्गा उपलब्ध गराउँदा सार्वजनिक सम्पत्ति अपचलन गरेको आरोपमा विशेष अदालतमा बिहीबार भ्रष्टाचार मुद्दा दायर गरिएको हो।

यस घटनाले सत्तारूढ दलहरूकै शीर्ष नेताहरूबीच सूचना आदानप्रदानको कमी र असमझदारी देखिएको संकेत गरेको छ।