कांग्रेस युवा नेताको संकल्प यात्रा जनकपुरमा

काठमाडौं — शुक्रबारबाट सुरु भएको युवा संकल्प यात्रा जनकपुर पुगेको छ ।

नेपाली कांग्रेसका युवा नेताहरूले भ्रष्टाचार उन्मुलन र सुशासन, युवालाई रोजगारीको सुनिश्चितता, महँगी र मूल्यवृद्धि नियन्त्रणलगायत विभिन्न एजेन्डाहरूमा केन्द्रीत रही शुक्रबार झापा जिल्लाको मेचीनगरबाटबाट सुरु भएको युवा संकल्प यात्रा आज (सोमबार) जनकपुर पुगेको छ ।

कांग्रेस नेता भूपेन्द्रजंग शाहीलगायतको समन्वयमा युवा मेचीनगरबाट सुरु भएर महनेन्द्रनगरमा अन्त्य हुने संकल्प यात्रालाई धनुषा जिल्ला काग्रेस पार्टी सभापति योगेन्द्र पंजियारको अध्यक्षतामा सञ्चालन भएको छ ।

कार्यक्रममा कांग्रेस नेता रन्जित कर्ण, भुपेन्द्रजंग शाही, प्रेमिका राना मगरलगायत र पूर्वसांसद दिनेश प्रसाईलगायत पार्टीका जिल्ला नेताहरुका साथै नेपाली कांग्रेसका भातृ संगठन नेपाल तरुण दल, नेपाल विद्यार्थी संघका जिल्ला नेताहरुको उपस्थिति रहेको छ ।

उक्त अवसरमा संकल्प यात्राका समन्वयकर्ता युवा नेता भूपेन्द्र जंग शाहीले आफूहरुले देशमा व्याप्त रहेको भ्रष्टाचारको उन्मुलनलगायतका विभिन्न एजेन्डाहरूमा केन्द्रित रहेर पूर्व—पश्चिम संकल्प यात्रा सुरु गरेको जनाए । उक्त अवसरमा नेता शाहीले सरकार नागरिकमैत्री हुनुपर्ने, नागरिकलाई सहज जीवनयापनका लागि राहत तथा सहुलियत दिनुपर्ने, हरेक क्षेत्रमा युवाको अर्थपूर्ण प्रतिनिधित्व हुनुपर्ने पनि जनाए ।

यात्रा नेपालको सुदूरपश्चिम कञ्चनपुरको महेन्द्रनगरसम्म पुगेर सकिने जनाइएको छ ।