एमाले फुटको सिलसिला भ्रातृ संगठनबाट, महिला र युवा संघ फुट्यो!

काठमाडौं– आन्तरिक विवाद रहेको नेकपा एमालेको फुटको सिलसिला भ्रातृ संगठनबाट सुरु भएको छ।

अखिल नेपाल महिला संघ र युवा संघ नेपाल विभाजन भएको छ। यी दुवै संगठनमा माधवकुमार नेपाल पक्षले राष्ट्रिय भेला गरी समानान्तर नेतृत्व चयन गरेको छ।

नेपाल पक्षको राष्ट्रिय भेला लगत्तै भएको महिला भेलाले जयन्ती राईको अध्यक्षतामा अखिल नेपाल महिला संघको समानान्तर कमिटी बन्यो। एमालेको महिला संघमा सीता पौडेलको नेतृत्व छ।

नेपाल पक्षको महिला संघ ४७५ सदस्यीय छ। महासचिवमा शान्ति अधिकारी, उपाध्यक्षहरूमा प्रदेश १ यशोदा अधिकारी, प्रदेश २ उषा पोखरेल, बागमतीमा सावित्रा भुसाल, गण्डकीमा सीता गिरी, लुम्बिनीमा राजेन्द्रलक्ष्मी गैरे, कर्णाली विजया विष्ट र सुदूरपश्चिममा माया भट्ट चयन गरिएको छ। उपमहासचिव सरला यादव, कोषाध्यक्ष देवकी श्रेष्ठलाई बनाएर समानान्तर कमिटी गठन गरिएको हो।

शनिबार युवा संघ नेपालले पनि समानान्तर कमिटी बनाएको छ। महासचिव रहेका नरेश शाहीलाई नेपाल पक्षले अध्यक्षमा चयन गरेको छ। संघको बरिष्ठ उपाध्यक्षमा क्रान्ति बुर्लाकोटी र महासचिवमा दिपक जीएम सहित नयाँ नेतृत्व चयन भएको हो ।

संस्थापन पक्षले वचनबहादुर सिंहलाई अध्यक्ष बनाएर युवासंघ पुनर्गठन गरेको थियो । नेपाल पक्षले अनेरास्ववियुको पनि समानान्तर कमिटी गठनको प्रक्रिया बढाएको छ। १० चैतमा अर्को समानान्तर कमिटी गठन हुनेछ।

‘मूल नेतृत्वमा समाधान नभए यो औपचारिक रुपमा फुटको सिलसिला नै मान्नुपर्छ। एमालेका शक्तिशाली संगठनको विभाजन र समानान्तर कमिटी गठन हुनुले नेतृत्व विवादलाई सतहसम्म लैजाने निश्चित छ’, एक नेताले भने,‘यसलाई नेपाल पक्षले निरन्तरता दिएको छ। ओली पक्षलाई सहनै नसक्ने संकेतका रुपमा यी समानान्तर कमिटी गठन हुन थालेका हुन्।’