दरबारमार्गकाे क्यासिनो प्यालेसमा राजस्वको छापा, एक करोड ५ लाख बरामद

काठमाडाैं- राजस्व अनुसन्धान विभागले दरबारमार्गस्थित क्यासिनो प्यालेसमा छापा मारेको छ ।

गएराति विभागको टोलीले  छापा मारेर क्यासिनोबाट १ करोड ५ लाख बरामद गरेको विभागका महानिर्देशक चक्रबहादुर बुढाले जानकारी दिए । विदेशी मुद्राको अवैध कारोबार गरेको सूचनाको आधारमा विभागले छापा मारेको थियो ।

विभागले अनुसन्धानका लागि क्यासिनोको सेफ र लकर पनि नियन्त्रणमा लिइएको जनाएको छ ।

२ वर्षदेखि बन्द रहेको होटल अन्नपुर्ण परिसरमा रहेको क्यासिनो प्यालेस एटलान्टिक रिक्रियसन प्रालिका नाममा दर्ता छ । होटल बन्द रहे पनि उक्त परिसरमा अनलाइन जुवा खेलाइँदै आएको छ ।

यसअघि गएको माघ तेस्रो साता विभागलेले उक्त क्यासिनोमा छापा मारेको थियो । त्यसक्रममा क्यासिनोका निर्देशक ऋषभ पावासहित तीन जनालाई पक्राउ गरेको थियो । पक्राउ पर्ने तीनै जना भारतीय नागरिक हुन् । उनीहरुविरुद्ध राष्ट्र बैंक ऐन र अनलाइन जुवा सम्बन्धी मुद्दामा अनुसन्धान चलिरहेको छ ।