अर्थको सीसीटीभी फुटेजको हार्ड डिस्क चार दिनमा पुग्यो संसदीय समिति, हेर्न भने बाँकी

काठमाडौँ- बजेट निर्माणका क्रममा गत जेठ १४ गते राति अर्थमन्त्री शर्माले अनधिकृत व्यक्तिलाई अर्थमन्त्रालयमा प्रवेश गराएको समयको फुटेज कैद भएको सीसीटीभीकोहार्ड डिस्क प्राप्त भएको समितिका एक सदस्यले बताएका छन्। शुक्रबार अर्थमन्त्रालयले छानबिन समितिलाई उक्त हार्डडिक्स उपलब्ध गराएको हो।

तर, समितिले प्राविधिक विषय भएकोले त्यसमा भएका सबै गतिविधि हेरिसकेको छैन। समितिले अर्थसँग मागेको सबै विवरण शुक्रबार पाएको छ। तर उक्ट हार्डडिक्समा अर्थमन्त्रायमा अनधिकृत व्यक्ति प्रवेश गरेको फुटेज छ या छैन भन्ने बारे अझै थाहा छैन।

अर्थमन्त्री शर्माले मन्त्रालयमा अनधिकृत व्यक्तिलाई मन्त्रालयमा लगेर करको दायरा हेरफेर गरेको समय (जेठ १४ गते राति) को सीसीटीभी फुटेज डिलिट गरेको भन्दै त्यसबारे छानबिन गर्न २२ असारमा प्रतिनिधि सभाका सभामुख अग्निप्रसाद सापकोटाले ११ सदस्यीय विशेष संसदीय समिति गठन गरेका थिए।

समितिमा नेकपा एमालेबाट प्रदीप ज्ञवाली, भानुभक्त ढकाल, खगराज अधिकारी र बिमला विक, लोकतान्त्रिक समाजवादी पार्टी (लोसपा)बाट लक्ष्मणलाल कर्ण, नेकपा माओवादी केन्द्रबाट शक्ति बस्नेत र देवप्रसाद गुरुङ, नेपाली कांग्रेसबाट पुष्पा भुसाल र सीताराम महतो, नेकपा एकीकृत समाजवादी पार्टीबाट सरला कुमारी यादव र जनता समाजवादी पार्टी (जसपा)बाट सुरेन्द्र प्रसाद यादव छन ।

अर्थमन्त्रालयले १३ दिनको भन्दा बढी समयसम्मको दृश्य भण्डारण नहुने जानकारी गराएपछि मेटाएको आरोप लागेको थियो। छानबिन समिति गठन गरेकै दिन अर्थमन्त्री शर्माले संसदमा सम्बोधन गरेर पदबाट राजीनामा दिएका थिए।

समितिले २८ असारदेखि काम छानबिन थालेको थियो। संसदीय विशेष समितिले अर्थमन्त्रालयका अर्थ सचिव मधु मरासनी, राजस्व सचिव कृष्णहरि पुष्कर, बजेट तथा राजस्व महाशाखाका डीजी, भन्सार र आन्तरिक राजस्व विभागका महानिर्देशकहरुसँग शनिबार बयान लिने भएको छ।

उनीहरुसँग छुट्टाछुटै बयान लिने समिति सचिव सुरेन्द्र अर्यालले जानकारी दिए।

संसदीय छानबिन समितिका अर्का एक सदस्यका अनुसार छानबिन समितिलाई दिइएको १० दिनमै प्रतिवेदन बुझाउने तयारी छ।