नवनियुक्त ३ मन्त्रीले लिए पद तथा गोपनीयताको शपथ

काठमाडौं – नवनियुक्त मन्त्रीहरूले पद तथा गोपनीयताको शपथ लिएका छन् । सोमबार अपराह्न शितल निवासमा उनीहरूले राष्ट्रपति विद्यादेवी भण्डारीबाट शपथ लिएका हुन् ।

जनता समाजवादी पार्टीले आफ्ना तीन मन्त्रीलाई फिर्ता बोलाएर नयाँ पठाएका मन्त्रीहरू मृगेन्द्रकुमार सिंह यादव, मोहम्मद इस्तियाक राई र प्रदीप यादवले पद तथा गोपनीयताको शपथ लिएका हुन् ।

मृगेन्द्रकुमार सिंह यादवलाई कृषि तथा पशुपन्छी मन्त्रालयको जिम्मेवारी दिइएको छ भने मोहम्मद इस्तियाक राईलाई भौतिक पूर्वाधार मन्त्रालयको जिम्मेवारी दिइएको छ । त्यस्तै प्रदीप यादवलाई वन तथा वातावरण मन्त्रालयको जिम्मेवारी दिइएको छ ।

पार्टी फुटको संघारमा रहेको अवस्थामा जनता समाजवादी पार्टी नेपालका अध्यक्ष उपेन्द्र यादवले सरकारमा रहेका ३ मन्त्रीलाई फिर्ता बोलाउदै नयाँ तीन मन्त्रीको नाम सिफारीस गरेका थिए । अध्यक्ष यादवको उक्त निर्णयप्रति डा.बाबुराम भट्टराई पक्ष भने रूष्ट छन् ।