पूर्वमन्त्री द्वय गुप्ता र श्रीवास्तव एमाले प्रवेश

काठमाडौं – पूर्वमन्त्री तथा सांसद बृजेशकुमार गुप्ता नेकपा एमालेमा प्रवेश गरेका छन् । सोमबार कपिलवस्तुको तौलिहवामा आयोजित कार्यक्रममा एमाले अध्यक्ष केपी शर्मा ओलीले उनलाई स्वागत गरेका छन् । त्यसका लागि ओली कपिलवस्तु नै पुगेका थिए ।

हृदयेश त्रिपाठीसँगै तत्कालीन राष्ट्रिय जनता पार्टी छाडेर स्वतन्त्र राजनीतिक समूहमा रहेका पूर्वमन्त्री द्वय वृजेश कुमार गुप्ता र धर्मबहादुर लाल श्रीवास्तवले त्रिपाठी समूह छाडेर एमाले रोजेका हुन् ।  गुप्ता प्रतिनिधिसभा सदस्य र श्रीवास्तव प्रदेशसभा सदस्य हुन् ।

गुप्तासहित प्रदेश सांसद धर्मबहादुर श्रीवास्तव, कपिलवस्तु नगरपालिका-४ का वडाअध्यक्ष सुदिप पौडेल, वडा नम्बर ४ का वडाअध्यक्ष रविन्द्र त्रिपाठी, वडा नम्बर १२ का वडाअध्यक्ष ओमप्रकाश पाण्डेय, बुद्धभूमि नगरपालिका-६ का वडा अध्यक्ष नन्दलाल यादव, यशोधरा गाउँपालिका-८ का वडाअध्यक्ष शहबुद्धिन मुसलमान, कपिलवस्तु नगरपालिकाका पूर्वमेयर रामदास गुप्ता, पूर्वउपमेयर वासुदेव कसौधन, कृष्णनगरका युवा नेता कुनाल प्रताप साहलगायतका नेताकार्यकर्ता नेकपा एमाले प्रवेश गरेका हुन् ।

गुप्ताले यसअघि हृदयश त्रिपाठीकाे स्वतन्त्र समूहबाट चुनाव जितेका थिए ।