सुधार गृहबाट भागेका युवा मृत फेला

विराटनगर – विराटनगरको सुधार गृहबाट भागेका एक युवा मृतावस्थामा फेला परेका छन् । विराटनगर–२ मा रहेको स्पर्श नेपाल नामक सुधार गृहबाट हिजो फरार भएका सुनसरीको गढी गाउँपालिका २ घर भइ धरानमा बस्दै आएका २६ वर्षीय दिलेन्द्र परियार मृतावस्थामा फेला परेका हुन् ।

सुधार गृहबाट परियारसहित उनका साथीहरु धरानका निशान धमला, विराटनगरका दिनेश बस्नेत र रोहित कामत फरार भएका थिए । हराएपछि खोजी गर्ने क्रममा परियारको शव आज दिउँसो मृत अवस्थामा फेला परेको मोरङ प्रहरीले जनाएको छ । भागेका अन्य तीन जना भने परिवारको सम्पर्कमा पुगेको पत्ता लागेको प्रहरीको भनाइ छ ।

सिंघीया खोलामा हामफालेर भाग्ने क्रममा परियार डुबेको बताइएको छ । उनको पानीमा डुबेर मृत्यु भएको प्रहरीको भनाइ छ । चारै जनालाई परिवारले सुधारका लागि एक महिनाअघि सुधार केन्द्रको जिम्मा लगाएका थिए ।

यता, मृतकका आफन्तले भने सुधार गृहको लापरबाहीका कारण मृत्यु भएको भन्दै कारबाहीको माग गरेका छन् । मृतकका बुबा दिलीपकुमार परियारले सुधार केन्द्रको लापरबाहीका कारण घटना भएको आरोप लगाए ।

सुधार केन्द्रका अध्यक्ष सञ्जीव खड्काले भने आफूहरुले लापरवाही नगरेको दाबी गरेका छन् । अहिले पनि सुधार गृहमा १५ जना युवा रहेका छन् । सरसफाइ गर्ने क्रममा उनीहरु भागेको खड्काको भनाइ छ ।