हिमाल आरोहणका लागि खुम्बु क्षेत्र गएका तीन फ्रान्सेली नागरिक बेपत्ता

सोलुखुम्बु  – खुम्बु क्षेत्रमा पर्ने खाङतेका हिमाल आरोहणमा आएका तीन जना फ्रान्सेली नागरिक बेपत्ता भएका छन्। जिल्ला प्रहरी कार्यालय सोलुखुम्बुका प्रमुख प्रहरी नायब उपरीक्षक कवित कटवालका अनुसार उनीहरू ६ दिनदेखि सम्पर्कविहीन छन्।

बेपत्ता हुनेमा थोमस, गाब्रियल र लुईस रहेको प्रहरी नायब उपरीक्षक कटवालले जानकारी दिए। उनीहरू ८ जनाको समूहमा होलिडे हिमालय ट्रेक्स एण्ड एक्सपिडिसन प्रालिमार्फत गत असोज १८ खाङतेका हिमाल आरोहणका लागि आएका थिए। उनीहरू कात्तिक ९ देखि सम्पर्कविहीन भएपछि खोजी जारी राखेको प्रहरीले बताएको छ ।

उनीहरुको खोजीका लागि सोमबारदेखि कैलाश एयरको हेलिकोप्टर समेत प्रयोग गरिएको छ। एउटै समूहमा गएकामध्ये अन्य पाँच जना सम्पर्कमा रहेको कम्पनीले जनाएको छ ।