

मुलुकलाई चुनावतर्फ लैजाने निर्णयकाे अनेरास्ववियुद्वारा स्वागत

काठमाडौं – सत्तारुढ दल नेकपा एमालेको विद्यार्थी संगठन अनेरास्ववियुले मुलुकलाई अस्थिरताबाट चुनावतर्फ लैजाने प्रधानमन्त्रीको कदम सही रहेको बताएको छ । प्रधानमन्त्रीको उक्त कदमको अनेरास्ववियुले स्वागत समेत गरेको छ ।
अखिल अध्यक्ष ऐन महरले शनिवार विज्ञप्ति जारी गर्दै वाम गठबन्धन र पार्टीभित्रैबाट निरन्तर मुलुकलाई अस्थिरतातर्फ लैजाने प्रयत्न भएकोले संवैधानिक रुपमै भएको प्रतिनिधिसभा विघटनले निकास दिने दाबी गरेका छन् ।
महरले सरकारले नेपालको नयाँ भौगोलिक नक्सा प्रकाशनदेखि जनपक्षीय कामहरु गरेपछि पार्टीभित्र र बाहिरबाट प्रधानमन्त्रीविरुद्ध षडयन्त्र भएको आरोप लगाएका छन् ।
उनले चुनावमा जाने निर्णयको स्वागत गर्दै कोभिड महामारीबाट जनतालाई जोगाउन तत्काल कोभिड भ्याक्सिन सहज उपलब्ध गराउन माग गरेका छन् ।
अनेरास्ववियुले अब सरकारको ध्यान कोभिडविरुद्ध भ्याक्सिन र महमारीविरुद्ध केन्द्रित हुनुपर्ने तथा राज्यको सबै शक्ति महामारी नियन्त्रणमा लगाउन माग गरेको छ ।

