‘हेयर ट्रान्सप्लान्ट’का क्रममा इन्जिनियरको मृत्यु, महिला डाक्टर फरार

कानपुर, भारत — उत्तर प्रदेशको कानपुरमा हेयर ट्रान्सप्लान्ट गराउँदै गर्दा एक सहायक इन्जिनियरको मृत्यु भएको छ। यो घटना भएको ५४ दिनपछि मात्रै प्रहरीमा उजुरी दर्ता गरिएको छ। मृतकको पत्नीले संलग्न महिला डाक्टरविरुद्ध गम्भीर आरोप लगाएकी छन् भने डाक्टर अहिले फरार छिन्।

गोरखपुरका स्थायी बासिन्दा ३७ वर्षीय विनीत दुबे कानपुरको पनकी पावर प्लान्टमा सहायक अभियन्ताको रुपमा कार्यरत थिए। उनी १३ मार्चका दिन इम्पायर वाराही क्लिनिक गएका थिए, जहाँ डाक्टर अनुश्का तिवारीले हेयर ट्रान्सप्लान्टको लागि इन्जेक्सन दिएकी थिइन्। इन्जेक्सन लगाउनेबित्तिकै विनीतको अनुहार सुन्निन थाल्यो र अवस्था बिग्रिँदै गयो। त्यसपछि उनलाई तत्कालै एक निजी अस्पतालमा भर्ना गरियो।

विनीतकी पत्नी जया दुबेका अनुसार डाक्टरले फोन गरेर सामान्य सूजन भएको र अस्पताल लैजाँदै गरेको जानकारी दिएकी थिइन्। तर अवस्था गम्भीर भएपछि परिवारले उनलाई रिजेन्सी अस्पतालमा सार्यो, जहाँ १४ मार्चमा उनको मृत्यु भयो। घटनापछि डाक्टर अनुश्का तिवारी क्लिनिक बन्द गरेर मोबाइल फोन समेत अफ गरी फरार भएकी छन्।

जया दुबेले सीएम पोर्टलमा सबै प्रमाणसहित उजुरी गरेपछि ५४ दिनपछि रावतपुर प्रहरी चौकीमा डाक्टरविरुद्ध लापरवाहीका कारण मृत्यु भएको अभियोगमा एफआईआर दर्ता गरिएको छ।

एसीपी अभिषेक पाण्डेले बताएअनुसार घटनाको अनुसन्धान भइरहेको छ र अगाडि आवश्यक कानुनी प्रक्रिया अघि बढाइनेछ।