वीरगञ्ज भन्सारबाट १ अर्ब ३९ करोड राजश्व संकलन

वीरगञ्ज- वीरगञ्ज भन्सार कार्यालयले चालु आर्थिक वर्ष २०७८/७९ को ८ महिनामा झण्डै १ खर्ब ३९ अर्ब रुपैयाँ राजस्व संकलन गरेको छ । चालु आवको साउनदेखि फागुनसम्म १ खर्ब ३८ अर्ब ९४ करोड ९४ लाख ५७ हजार रुपैयाँ राजश्व संकलन गरेको हो ।

८ महिनामा वीरगञ्ज भन्सारले भन्सार विभागले दिएको राजस्व लक्ष्यभन्दा ३.६ प्रतिशत बढी संकलन गर्न सफल भएको छ । वीरगञ्ज भन्सारलाई विभागले ८ महिनामा १ खर्ब ३४ अर्ब १६ करोड ७ लाख ६२ हजार रुपैयाँ राजस्व उठाउने लक्ष्य दिएको थियो । लक्ष्य भन्दा ३.६ प्रतिशत अर्थात ४ अर्ब ७८ करोड ८६ लाख ९५ हजार रुपैयाँ बढी राजश्व संकलन भएको  भन्सारको तथ्यांकले देखाएको छ ।

भन्सार कार्यालयको तथ्यांकअनुसार अघिल्लो आव २०७७/७८ को समीक्षा अवधिको तुलनामा यो वर्ष वैदेशिक व्यापारमा ६० प्रतिशतले वृद्धि भएको छ ।  चालू आवको साउनदेखि फागुनसम्ममा यो नाकाबाट ५ खर्ब ३९ अर्ब रुपैयाँ बराबरको मालसामान भित्रिएको छ । गत आवको सोही अवधिमा ३ खर्ब ३१ अर्ब रुपैयाँको आयात भएको थियो । आयात बढेर वैदेशिक विनिमयमा दबाब परेपछि सरकारले आयातमा कडाइ गरेको छ ।

४ खर्ब ६३ अर्ब रुपैयाँबराबरको मालसामान आयात हुँदा निर्यात भने ६६ अर्ब रुपैयाँको मात्र भएको प्रमुख भन्सार अधिकृत हरिहर पौडेलले बताए । अघिल्लो वर्षको फागुनसम्ममा २६ अर्ब रुपैयाँको निकासी व्यापार भएको तथ्यांक भन्सार कार्यालयसँग छ । निकासी व्यापार गत आवको भन्दा १५२ प्रतिशतले बढेको देखिन्छ । यस्तै आयातमा ५२ प्रतिशत वृद्धि भएको छ ।