ओलीलाई प्रचण्डको फोन : एमसीसीका विषयमा निर्णय लिन आग्रह

काठमाडौं – नेकपा माओवादी पार्टीका अध्यक्ष पुष्पकमल दाहाल (प्रचण्ड)ले एमसीसीको विषयमा निर्णय गर्न नेकपा अध्यक्ष केपी शर्मा ओलीलाई आग्रह गरेका छन् ।

बिहिबार साँझ अध्यक्ष प्रचण्डले ओलीलाई टेलिफोन गरेर एमसीसीका विषयमा निर्णय गर्न आग्रह गरेका हुन् । जवाफमा अध्यक्ष ओलीले एमसिसी पारित गर्ने जिम्मेवारी सत्ता गठबन्धनको भएको बताएका छन् ।

उनले आफूलाई हटाउन अमेरिकनहरूसँग एमसीसी पारित गर्छु भनेर गरेको वाचा पूरा गर्न अध्यक्ष प्रचण्डलाई चुनौती दिएका छन् । आफूलाई हटाइसकेपछि ४– ५ महिनामा पारित गर्छौं’ भनेर लिखित कागज नै गरेको जवाफ दिएका छन् ।

त्यस्तै, ‘उनले अहिले सत्ता चलाइरहनु भएको छ, प्रतिनिधिसभामा १ सय ६५ सदस्य भएको र पहिले आफूले निर्णय गर्नुस्,नेकपा एमाले त निर्णय गरिहाल्छ’  एमाले प्रचार-प्रसार विभागका उपप्रमुख बिष्णु रिजालले सामाजिक सञ्जाल फेसबुक मार्फत यस्तो लेखेका छन् ।

माओवादीमा संशोधन विना एमसीसी पास गर्न नहुने मत बलियो छ भने एमालेले सरकार निर्णयमा पुगेपछि आफ्नो धारणा बनाउने अडानमा छ । तर सत्ताको नेतृत्व गरेको नेपाली काँग्रेसका सभापति एवं प्रधानमन्त्री शेरबहादुर देउवा भने कुनैपनि हालतमा एमसीसी पास गर्न गठबन्धनलाई दबाब दिइरहेका छन् ।