दिउँसो ३ बजे मन्त्रिपरिषदको बैठक बस्दै, स्थानीय तह निर्वाचनको मिति तोक्न सक्ने

काठमाडौं – आज मन्त्रिपरिषदको बैठक बस्दै छ। आज (सोमबार) दिउँसो ३ बजे मन्त्रिपरिषद् नियमित बैठक बस्न लागेको हो।

आज बस्ने बैठकले स्थानीय तह निर्वाचनको मिति तोक्नसक्ने जनाइएको छ। यस अघि बिहीबार बस्ने मन्त्रिपरिषदको नियमित बैठक पनि प्रधानमन्त्री देउवाले रोकेका थिए।

गत माघ १८ गते प्रधानमन्त्री शेरबहादुर देउवाले निर्वाचन आयोगका पदाधिकारीसँग छलफल गरेका थिए। आयोगले जेठ ४ गते स्थानीय चुनावको मिति घोषणा गर्न सरकारलाई सिफारिस गरिसकेको छ।

आयोगसँगको छलफलमा प्रधानमन्त्री शेरबहादुर देउवाले आयोगले सिफारिस अनुसार नै मन्त्रिपरिषदको आगामी बैठकमा मिति तोक्ने भन्दै आवश्यक तयारी थाल्न आयोगलाई निर्देशन दिइसकेको छन्। आयोगले पनि सोही अनुरुप काम अघि बढाइसकेको छ।

हिजो मात्रै प्रधानमन्त्री शेरबहादुर देउवाले प्रमुख प्रतिपक्षी दल नेकपा एमालेका अध्यक्ष केपी शर्मा ओली र सत्ता गठबनन्धनका सहयात्री माओवादी केन्द्रका अध्यक्ष पुष्पकमल दाहालसँग स्थानीय चुनावलगायतका विषयमा छलफल गरका थिए।