भारतमा संक्रमणको ‘रेकर्ड ब्रेक’, एकैदिन साढे ३ लाख संक्रमित 

नयाँ दिल्ली – भारतमा कोभिडबाट संक्रमित हुनेको संख्या दिनमै साढे तीन लाख नजिक पुगेको छ । पछिल्लो २४ घन्टामा तीन लाख ४७ हजार २५४ जनामा कोभिड देखिएको छ ।

यो संख्या तेस्रो लहरको  संक्रमणमा अहिलेसम्मकै उच्च हो । कोभिडको नयाँ भेरियन्ट ओमिक्रोन देखिएसँगै संक्रमितको संख्या दिनहुँ बढेको छ ।

यसैबीच, दिल्लीमा सरकारले लगाउँदै आएको रात्रीकालीन कर्फ्यू हटाउने भएको छ । कोभिड संक्रमित बढेसँगै सरकारले खोप अभियानलाई तीव्र पारेको छ। पछिल्लो २४ घन्टामा साढे दुई लाख संक्रमित निको भएका छन् ।

त्यस्तै गत २४ घन्टामा ७०३ जनाको मृत्यु भएको छ । यससँगै भारतमा हालसम्म ३ करोड ८५ लाख ६६ हजार २७ जनामा कोरोना पुष्टी भएको छ भने ४ लाख ८८ हजार ४ सय २२ जनाको मृत्यु भइसकेको छ ।