अछाममा बस दुर्घटना हुँदा २ को मृत्यु, २९ घाइते
कागजपत्र |
काठमाडौं – अछाममा बस दुर्घटना हुँदा २ जनाको मृत्यु भएको छ भने २९ जना घाइते भएका छन् । घाइते २१ जनाको जिल्ला अस्पताल र ८ जनाको बयालपाटा अस्पतालमा उपचार भइरहेको छ ।
मंगलसेनबाट धनगढी जाँदै गरेको ना ६ ख ८२९ नम्बरको बस मंगलसेन नगरपालिका-४ मा दुर्घटना भएको हो ।
दुर्घटनामा मंगलसेन नगरपालिका-१ का २२ वर्षीया अनमोल थापाको मृत्यु भएको छ । मृत्यु भएका अर्का यात्रुको भने सनाखत हुन नसकेको अछामका प्रहरी प्रमुख डिएसपी तुल्सीराम अर्यालले बताए ।
बसमा धेरैजसो कामको खोजीमा जान थालेका परिवार र अध्ययनका लागि काठमाडौंलगायतका सहरमा जान लागेका विद्यार्थी रहेको जिल्ला अस्पताल मंगलसेनमा उपचाररत घाइते मंगलसेन नगरपालिका ३ की २४ वर्षीया सिर्जना साउदले बताइन् । मंगलसेनबाट चढेको बस १५ मिनेट नबित्दै दुर्घटना भएको उनको भनाइ छ ।
