पाँच दलीय सत्ता गठबन्धनले उपनिर्वाचन मिलेर लड्ने

काठमाडौं – सत्तारुढ पाँच दलीय गठबन्धनले राष्ट्रिय सभा, प्रतिनिधि सभा तथा प्रदेशसभाको आसन्न उपनिर्वाचनमा सहकार्य गर्ने भएको छ। गठबन्धनमा आबद्ध शीर्ष नेताहरूले मंगलबार ७ बुँदे विज्ञप्ति जारी गर्दै उपनिर्वाचनमा राजनीतिक सहकार्य हुने बताएका हुन्।

जारी विज्ञप्तिमा गठबन्धनको सरकार बनिसकेपछि मुलुक राजनीतिक लिकमा फर्किएको समेत दाबी गरिएको छ। ‘राष्ट्रियता, लोकतन्त्र सम्वर्द्धन, संविधानको रक्षा र सुशासनको प्रवर्द्धनलाई वर्तमान गठबन्धन सरकारले मूल मन्त्र बनाएको छ,’ विज्ञप्तिमा भनिएको छ।

कोभिड–१९ को संक्रमण रोकथामलाई पहिलो प्राथमिकतामा राखेर खोप अभियानलाई युद्धस्तरमा अघि बढाइएको उनीहरुले बताएका छन्।गठबन्धनकै प्रयासमा कोरोनाले थलिएको अर्थतन्त्रले गति लिन थालेको दाबी पनि विज्ञप्तिमा गरिएको छ।

विज्ञप्तिमा प्रधानमन्त्री एवं कांग्रेस सभापति शेरबहादुर देउवा, माओवादी अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष माधवकुमार नेपाल, जनता समाजवादी पार्टीका नेता अशोक राई र राष्ट्रिय जनमोर्चा नेतृ दुर्गा पौडेलले हस्ताक्षर गरेका छन्।