विश्वप्रकाश र गगनलाई कांग्रेस प्रतिनिधिले महामन्त्रीमा जिताउलान्? 


काठमाडौं– नेपाली कांग्रेसको आसन्न १४औं महाधिवेशनमा नेता कार्यकर्ता व्यस्त हुन थालेका छन्। अधिकांश पालिकास्तरको अधिवेशन र हिमाली जिल्लाका अधिवेशन सकेको कांग्रेस अब पहाडी र तराईका क्षेत्र, जिल्ला र प्रदेश अधिवेशनतिर लम्किएको छ।

कांग्रेसमा सभापति र महामन्त्रीका आकांक्षी धेरै छन्। सभापतिका लागि प्रधानमन्त्री शेरबहादुर देउवा फेरि दोहोरिने तयारीमा छन् भने बरिष्ठ नेता रामचन्द्र पौडेल, महामन्त्री शशांक कोइराला, उपसभापति विमलेन्द्र निधि, पूर्वमहामन्त्री प्रकाशमान सिंह, केन्द्रीय सदस्य शेखर कोइरालालगायतको दाबी छ।

यसपटक महामन्त्रीमा भने प्रवक्ता विश्वप्रकाश शर्मा र केन्द्रीय सदस्य गगन थापा पनि लड्दैछन्। यीबाहेक डा. मिनेन्द्र रिजाल, सुनिलबहादुर थापालगायतको पनि दाबी रहेको छ। पुस्ता हस्तान्तरणको चर्चा चलिरहेको कांग्रेसले दुई महामन्त्री नै निर्वाचित गराउने विधान कायम गरेको छ।

धेरै आकांक्षी रहँदा विश्वप्रकाश र गगनलाई कांग्रेस महाधिवेशन प्रतिनिधिले जिताउलान्?

‘क्रियाशील सदस्य, वडादेखि जिल्लासम्म आउने प्रतिनिधि कुन उमेर र रुची राख्ने आउँछन् त्यसमा भरपर्छ’, एक केन्द्रीय सदस्य भन्छन्,‘तर यस पटक युवापुस्ता प्रतिनिधिमा हावी भएका कारण जुन खेमाबाट उठेपनि विश्वप्रकाश र गगन महामन्त्री निर्वाचित हुने सम्भावना देखिन्छ।’

सबै जिल्लाबाट महाधिवेशनमा आउने प्रतिनिधिको टुंगो नलागीसकेका कारणले दुवैको जितको ‘सोलिड विश्लेषण’ गर्न कठिन भए पनि ‘टे«न्ड’का आधारमा अनुमान गर्न सकिने ति केन्द्रीय सदस्य बताउँछन्।

विश्वप्रकाश पदाधिकारीमा पहिलो पटक उम्मेदवारी दिन लागिरहेका छन् भने गगनले १३ औं महाधिवेशनमा महामन्त्री पदमा पराजय भोग्नु परेको थियो।

झापा जिल्लाका पालिकास्तरका अधिवेशनले विश्वप्रकाशलाई केही धक्का दिएको विश्लेषण गरिएको छ। उक्त जिल्लामा अघिल्लो महाधिवेशनमा सभापति पदमा उठी दोस्रो राउन्डमा देउवालाई सघाएका पूर्वमहामन्त्री कृष्ण सिटौला पक्षका प्रतिनिधि बढी आउने भएकाले देशका अन्य जिल्लाको भर विश्वप्रकाशलाई रहेको बताइन्छ।

तर गगनले भने पहिला पनि आफू पराजित भएका कारणले यस पटक प्रतिनिधिले जिताउने आश राखेका छन्। उनी सभापतिको तयारी गर्दागर्दै अहिले महामन्त्रीमा नै आफ्नो भूमिका देखिएको ठान्छन्।

प्रतिक्रिया