माधव नेपाल र महन्थ ठाकुर दुबैको पार्टीको नाम फेरियो
कागजपत्र |
काठमाडौं – माधवकुमार नेपाल र महन्थ ठाकुर दुबै पक्षको पार्टीको नाम परिवर्तन भएको छ । दुबै पक्षले निर्वाचन आयोगमा दल दर्ताका लागि दिएको नाम परिवर्तन गरेका हुन् ।
मंगलबार नेपाल पक्षले नेकपा एमाले समाजवादी र ठाकुर पक्षले जनता समाजवादी पार्टी नेपाल (लोकतान्त्रिक) नाममा दल दर्ताको लागि निवेदन दिएको थिए । तर, ती नामहरू दर्ता गर्न नमिल्ने भएपछि दुबै पक्षले नाम परिवर्तन गर्ने भएका हुन् । नेपाल पक्षले नेपाल कम्युनिष्ट पार्टी एकीकृत समाजवादी बनाउन निवेदन दिएको छ । आयोग उच्च स्रोतका अनुसार नेपाल पक्षले बिहीबार सो नाम राखेर नयाँ निवेदन पेश गरिसकेको छ ।
त्यस्तै महन्थ ठाकुर पक्षले पार्टीको नाम लोकतान्त्रिक समाजवादी पार्टी राखिएको नेता केशव झाले जानकारी दिए ।
सर्वोच्च अदालतको फागुन २३ गतेको फैसलाका आधारमा एमाले जोडिएको र जसपा जोडिएको पार्टीको दल दर्ता नहुने सम्भावना देखेर उनीहरुले नाम परिवर्तन गरेका हुन् ।
जनता समाजवादी पार्टी जसपाको उपेन्द्र यादव पक्षले आफ्नो पार्टीसँग मिल्ने नाम नदिन निर्वाचन आयोगमा बिहीबार निवेदन दिएका थिए ।
