एक्स्पर्ट एजुकेशन सञ्चालक विद्यार्थीलाई पार्छन् परिबन्ध, शक्ति केन्द्रसँग अन्तरङ्ग सम्बन्ध

काठमाडौं– अस्ट्रेलियामा मुख्य कार्यालय राखी विभिन्न देशका विद्यार्थी ओसार्ने एक्स्पर्ट एजुकेशन एन्ड भिसा सर्भिसका सञ्चालकहरुले नेपालका ठूला आयोजना प्रभावका आधारमा लाइसेन्स लिँदै लगानी गर्ने गरेको खुलेको छ।

अस्ट्रेलियाका विभिन्न विश्वविद्यालयमा विद्यार्थीलाई भर्ना गराउने भनी मोटो रकम लिएर बोलाउने र दर्ता नभएका कलेजमा राखेर अलपत्र पार्ने गरेको खुलेको छ।

एक्स्पर्टले दर्ता नै नभएको अस्ट्रेलिया इन्स्टिच्युट अफ बिजनेश टेकनोलोजी कलेजमा विद्यार्थी पठाएर अप्ठ्यारोमा पारेको थियो। ठूलो रकम लगानी गरी गएका विद्यार्थीले उक्त विषयमा गुनासो गर्दा दबाब दिने र घरपरिवारसम्मलाई बाध्यतामा पारेर रकम असुल गरेको थियो।

सोही कन्सल्ट्यान्सीमार्फत कमाएको अर्बौं रकम नेपालमा रहेका विभिन्न हाइड्रोमा लगानी गर्दै आएका छन् सञ्चालक बद्री अर्याल र सञ्जिव शर्माहरुले। उनीहरुले यहाँका राजनीतिक दलका नेता, मन्त्रीलगायतलाई आर्थिक प्रभाव, शेयरलगायत दिएर लाइसेन्स लिने र आफूलाई जोगाउने काम गर्दै आएको खुलेको हो।

पछिल्ला बर्षमा अर्याल र शर्माहरुले एक हजार करोड बराबरको लगानीमा रुकुममा सानी भेरी हाइड्रोमा ठूलो लगानी गरेका छन्। सत्तारुढ नेकपा माओवादी केन्द्रका नेताहरुलाई पनि शेयर दिएर उनीहरुले प्रयोग गरेको स्रोतले बतायो।

‘शक्ति केन्द्रमा भएका विभिन्नलाई प्रयोग गर्ने, अस्ट्रेलिया जाँदा घुमाउनेदेखि अनेक प्रभावमा पारेर विद्यार्थीलाई अलपत्र पारी कमाएको पैसा नेपालमा ठूलो आम्दानी हुने हाइड्रोलगायतमा लगानी गरेका छन्’, स्रोतले भन्यो,‘यसबाहेकका विभिन्न धन्दामा पनि उनीहरुको संलग्नता रहेको छ।’

अलपत्र परेका विद्यार्थीले गुनासो गर्दा शक्ति केन्द्रको आडमा परिवारलाई पनि परिबन्धमा पार्ने तथा सहमति गर्दै एक्स्पर्ट एजुकेशनको धन्दा निरन्तर चलाउँदै आएका विविन्न समयमा आएका विवरणहरुले पुष्टि गरेका छन्।

‘खासगरी माओवादीका नेताहरुलाई विभिन्न प्रकारले आर्थिक लाभ दिएर मनपरी ढंगले काम गरिएको छ’, स्रोतले भन्यो,‘नेपालमा समस्यामा परेको खण्डमा कानुनी कारबाहीबाट जोगिन यसो गरिएको छ।’

नेपाल सरकारको प्रतिनिधिका रुपमा अस्ट्रेलियामा रहने राजदूतका मार्फतबाट पनि एक्स्पर्टका सञ्चालकहरुले राज्यलाई प्रभावित बनाउने गरेका छन्। अघिल्लो पटक माओवादीको कोटाबाट पुगेकी राजदूत लक्की शेर्पा र पछिल्लो चरणमा केपी शर्मा ओली सरकारले हटाएका माओवादी कोटाकै महेश्वर दाहालमार्फत माओवादी नेतासँग अर्याल र शर्माहरुले सम्बन्ध स्थापित गरेको बताइन्छ।

यो पनि पढ्नुहोस्

सानी भेरी हाइड्रोमा अर्थमन्त्री शर्माको लगानी, उर्जामन्त्री हुँदा लाइसेन्स दिएवापत ठूलो शेयर