फेरि फेरिने भए तीन प्रदेश प्रमुख !

काठमाडौं – सरकारले प्रदेश २, गण्डकी र लुम्बिनी प्रदेशको प्रदेश प्रमुख फेर्ने भएको छ । केपी शर्मा ओली सरकारले नियुक्त गरेका तीन वटा प्रदेशका प्रमुखहरु परिवर्तन गर्न लागेको प्रधानमन्त्री शेरबहादुर देउवा निकट स्रोतले जनाएको छ ।

प्रदेश २ मा राजेश झा अहिराज, गण्डकीमा सीता पौडेल र लुम्बिनीमा धर्मनाथ यादव प्रदेश प्रमुख छन् । प्रदेश २ मा तत्कालिन प्रदेश प्रमुख तिलक परियारलाई बर्खास्त गरेर गत फागुन ७ गते अहिराज प्रदेश प्रमुख नियुक्त भएका थिए ।

त्यस्तै गण्डकी प्रदेशमा तत्कालिन प्रदेश प्रमुख अमिक शेरचनलाई बर्खास्त गरेर गत वैशाख २० गते पौडेल प्रदेश प्रमुख नियुक्त भएकी थिइन् । लुम्बिनी प्रदेशमा भने यादव २०७६ कात्तिक १८ गते प्रदेश प्रमुखमा नियुक्त भएका थिए ।

प्रधानमन्त्री परिवर्तन भएसँगै प्रदेश प्रमुख फेरिने चलनलाई वर्तमान प्रधानमन्त्री शेरबहादुर देउवाले पनि अनुशरण गर्न लागेको देखिएको छ । यसअघि प्रतिनिधिसभा निर्वाचनपछि देउवाले नियुक्त गरेका प्रदेश प्रमुखहरुलाई केपी ओली प्रधानमन्त्री भएपछि परिवर्तन गरेका थिए ।