उपेन्द्र यादव पक्षका कार्यकारिणी सदस्यहरुलाई गोदाबारीको रिसोर्टमा राखियो, भोली आयोगको फैसला

काठमाठौं – जनता समाजवादी पार्टी नेपाल (जसपा) को उपेन्द्र यादव पक्षीय कार्यकारिणी समितिका सदस्यलाई रिसोर्टमा राखिएको छ । जसपाको आधिकारितासम्बन्धी विवाद छिनोफानो गर्न सोमबार ‘हेड काउण्ट’ को आधारमा निर्वाचन आयोगले निर्णय सुनाउने छ ।

जसका लागि यादव पक्षीय ३२ कार्यकारिणी सदस्यहरुबीच ललितपुरको गोदावरीस्थित रिसोर्टमा आन्तरिक छलफल भैरहेको पार्टीका नेता इस्तियाक राईले बताए । जनता समाजवादी पार्टीमा अध्यक्षद्वय महन्थ ठाकुर र उपेन्द्र यादव पक्षबीच विवाद बढ्दै गएपछि यादवले पार्टीको आधिकारिकता दाबी गर्दै निर्वाचन आयोगमा निवेदन दिएका थिए ।

निवेदनपछि आयोगले हेड काउण्टको आधारमा पार्टी आधिकारिकताको निर्णय सुनाउने भएपछि उक्त निर्णयविरुद्ध जसपाको महन्थ ठाकुर पक्ष भने सर्वोच्च अदालत पुगेको छ । ठाकुरका लागि अन्तिम आशा–भरोसा सर्वोच्च अदालत बनेको छ । अब जसपामा रहने वा नरहने सर्वोच्च अदालतको आदेशमा भर पर्ने अध्यक्ष ठाकुरले बताएका छन् ।

निर्वाचन आयोगले विवाद निरुपणका लागि इजलास गठन गरेर सुनुवाइ गर्दै आएकोमा बिहीबारको इजलासले ११ साउनका लागि निवेदक पक्ष र विपक्षीलाई आयोगमा केन्द्रीय कार्यकारिणी समितिमा रहेका ५१ सदस्यसहित हाजिर हुन आदेश दिएको छ ।