माओवादी केन्द्रमा मन्त्रीका लोभी धेरै, प्रचण्ड भन्छन्– ४९ जना सांसदको आतंक भयो

काठमाडौं– नेपाली कांग्रेसका सभापति शेरबहादुर देउवा नेतृत्वको गठबन्धन सरकारमा माओवादी केन्द्रका तर्फबाट मन्त्री बन्ने लोभीहरु धेरै भएको खुलासा भएको छ।

प्रतिनिधि सभा तथा राष्ट्रिय सभामा रहेका सांसद यसरी मन्त्री बनाइदिनका लागि मागपत्र लिएर अध्यक्ष पुष्पकमल दाहाल प्रचण्डनिवास खुमलटार पुगिरहेका छन्।

भएका ४९ जना सांसदले नै मन्त्री बन्नका लागि लोभ देखाएको र सोही विषयले ४–५ दिनयता आफू आतंकित भएको प्रचण्डले खुलाएका छन्। नरबहादुर कर्माचार्यको स्मृति दिवसका अवसरमा आयोजित कार्यक्रमलाई सम्बोधन गर्ने क्रममा प्रचण्डले यस्तो विषय खुलाएका हुन्।

‘पाए त ४९ जना नै बनाउनु हुन्थ्यो, त्यसो गर्न पाइन्न। परे ७ जनासम्म बढीमा मन्त्री पाउने हो। अहिले नेतृत्वले बनाइदिए ठिक, नबनाए नेतृत्व खराब भन्ने यो प्रवित्ति छ’, उनले भने,‘बोल्दा बडो क्रान्तिकारी कुरा गर्ने तर चाहिनेचाहिँ मन्त्री नै।’

उता, एमालेभित्रबाट अहिलेको सत्ता गठबन्धन भत्काउनका लागि निक्कै खेल भएको उनको भनाई थियो। एमाले उपाध्यक्ष भिम रावलले राजीनामा दिएको प्रसंग कोट्याउँदै उनले गठबन्धन बनाउनका लागि भूमिका खेल्ने राजीनामा प्रकरणले ढलेको बताए।

गठबन्धन जोगाउनका लागि माधवकुमार नेपालसँग निरन्तर कुराकानी भइरहेको प्रचण्डले बताए। उनले कार्यक्रमपछि नेता नेपाललाई निवासमा भेट गरेका थिए।