एमाले एकताका लागि माधव नेपाललाई चाहियो पराजित भएको ‘पद’

काठमाडौं– एमाले एकताका लागि नेता माधवकुमार नेपालले आफू पराजित भएको ‘पद’लाई सर्तका रुपमा अघि सारेका छन्। एमाले विधानमा नै नभएको अर्को अध्यक्ष पदसहित केन्द्रीय कमिटीमा समान सदस्य संख्या भए मात्र एकता गर्ने नेता नेपालको स्पष्ट भनाई रहेको छ।

एमाले अध्यक्ष केपी शर्मा ओलीले हालसम्म नेपाल समूहले गरेका सबै राजनीतिक अपराधलाई माफी दिने भन्दै एकताका लागि लचिलो हुने प्रस्ताव पेस गरेका थिए। त्यसअघि पार्टी मिलाउन कार्यदलले राखेको प्रस्तावलाई अनुमोदन पनि गराएका थिए।

नेता नेपालसँग अन्तिम पटक वार्ता गर्नका लागि अध्यक्ष ओलीले उपाध्यक्ष भिम रावललाई जिम्मेवारी दिएका छन्। रावल दुई नेताबीचको वार्ताको समय मिलाउने अभ्यासमा लागेका छन्। तर, नेता नेपालले प्याकेजमा सहमति गर्नुपर्ने भन्दै नवौं महाधिवेशनमा ओलीसँग पराजित भएको अध्यक्ष पद माग गरेका छन्।

स्रोतका अनुसार अध्यक्ष पद नभए उक्त पदबाट ओलीको राजीनामालाई नेता नेपालले सर्तका रुपमा अघि सारेका छन्। स्रोतले भन्यो,‘नेता नेपाल माओवादीसँग मिल्नका लागि जसरी पनि ओलीको बहिर्गमन वा उनको अल्पमत चहान्छन्। अनि मात्र एकता गर्ने नत्र विभाजन नै सही हुने बताउन थालेका छन्।’

नेपाल पक्षका नेतासहितको कार्यदलले तयार पारेको १० बुँदामा पनि उनको सहमति भएन। बरु, देउवालाई प्रधानमन्त्री बनाउनका लागि मत दिने निर्णयमा पुगेपछि उपाध्यक्ष रावल रुष्ट बनेका थिए।