लुम्बिनी प्रदेशमा पाँच नयाँ मन्त्रीको शपथ, कार्यविभाजन पनि टुंगियो
कागजपत्र |
रुपन्देही – लुम्बिनी प्रदेश सरकारमा नवनियुक्त पाँच मन्त्रीले पद तथा गोपनीयताको शपथ लिएका छन्।
प्रदेश प्रमुख कृष्णबहादुर घर्तीमगरले सोमबार मुख्यमन्त्री चेतनारायण आचार्यको सिफारिसमा नियुक्त भएका मन्त्रीहरूलाई शपथ गराएका हुन्।
मुख्यमन्त्री आचार्यले सत्ता साझेदार दल नेकपा एमालेबाट चार जना र जनता समाजवादी पार्टीबाट एक जनालाई समेटेर मन्त्रिपरिषद् विस्तार गरेका हुन्।
शपथसँगै मन्त्रीहरूको कार्यविभाजन पनि सार्वजनिक गरिएको छ। जसअनुसार तुलसीप्रसाद चौधरीलाई कृषि, भूमि व्यवस्था तथा सहकारी मन्त्रालयको जिम्मेवारी दिइएको छ।
त्यस्तै डिल्लीराज भुसाललाई ऊर्जा, जलस्रोत तथा सिँचाइ मन्त्रालयको जिम्मेवारी दिइएको छ भने रामजीप्रसाद घिमिरेलाई स्वास्थ्य मन्त्रालयको जिम्मा दिइएको छ।
यसैगरी रत्नबहादुर खत्रीलाई भौतिक पूर्वाधार विकास मन्त्रालयको जिम्मेवारी दिइएको छ। जनता समाजवादी पार्टीका भण्डारीलाल अहिरलाई भने आन्तरिक मामिला तथा कानुन मन्त्रालयको जिम्मेवारी दिइएको छ।
यसअघि कार्यविभाजनबिना नै नियुक्त भएका मन्त्रीहरूलाई सोमबार औपचारिक रूपमा जिम्मेवारी तोकिएको हो।
मन्त्रिपरिषद् विस्तारसँगै प्रदेश सरकारको प्रशासनिक कामकाज अझ प्रभावकारी हुने अपेक्षा गरिएको छ। तर सत्ता साझेदार दलहरूबीच मन्त्रालय बाँडफाँट र आगामी नीतिगत प्राथमिकताबारे राजनीतिक चासो पनि बढेको छ।
