प्रतिनिधिसभा सचिवमा प्रकाश अधिकारी नियुक्त

काठमाडौं-  प्रतिनिधिसभाको सचिव पदमा प्रकाश अधिकारी नियुक्त भएका छन्।

राष्ट्रपति रामचन्द्र पौडेलले प्रतिनिधिसभाका सभामुख डोलप्रसाद अर्यालको सिफारिसमा अधिकारीलाई उक्त पदमा नियुक्त गरेका हुन्।

नेपालको संविधानको धारा १०६ को उपधारा (१) बमोजिम सभामुखको सिफारिसमा प्रतिनिधिसभाको सचिव नियुक्त गर्ने व्यवस्था रहेको छ। संविधानमा राष्ट्रपतिले प्रतिनिधिसभाका सभामुख र राष्ट्रियसभाका अध्यक्षको संयुक्त सिफारिसमा संघीय संसद्को महासचिव तथा सम्बन्धित सदनका प्रमुखको सिफारिसमा सचिव नियुक्त गर्ने उल्लेख छ।

नवनियुक्त सचिव अधिकारी संखुवासभाको खाँदबारी नगरपालिका–३ का निवासी हुन्। उनले त्रिभुवन विश्वविद्यालयबाट ग्रामीण विकास विषयमा स्नातकोत्तर गरेका छन् भने दक्षिण कोरियाबाट अन्तर्राष्ट्रिय व्यापार तथा आर्थिक साझेदारी विषयमा पनि स्नातकोत्तर उपाधि हासिल गरेका छन्।

निजामती सेवामा २४ वर्षको अनुभव भएका अधिकारी उपसचिव पदबाट सेवानिवृत्त कर्मचारी हुन्।