home

काठमाडौं- काठमाडौं महानगरपालिकाले नदी किनार र सार्वजनिक जग्गामा बनेका अव्यवस्थित तथा अनधिकृत संरचना हटाइएपछि खाली भएका स्थानहरूको तत्काल संरक्षण र व्यवस्थापन गर्न निर्देशन दिएको छ।

आइतबार थापाथलीस्थित बागमती नदी किनारमा खाली गराइएको क्षेत्रको निरीक्षण गर्दै कार्यवाहक प्रमुख सुनिता डङ्गोलले प्रमुख प्रशासकीय अधिकृत सरोज गुरागाईंलाई खाली गरिएका तथा आगामी दिनमा खाली गरिने क्षेत्रहरूमा तुरुन्त तारबार लगाएर सुरक्षा सुनिश्चित गर्न निर्देशन दिनुभयो। यसका लागि अधिकार सम्पन्न बागमती सभ्यता एकीकृत विकास समिति र अन्य सरोकारवाला निकायसँग समन्वय गर्न पनि उहाँले आग्रह गर्नुभयो। साथै, सार्वजनिक निर्माण विभागमार्फत आवश्यक संरक्षण कार्य अघि बढाउन निर्देशन दिइएको छ।

त्यसै क्रममा डङ्गोलले नागार्जुनको इचङ्गुस्थित कोलोनीको भौतिक अवस्थाको पनि निरीक्षण गर्नुभएको थियो। अव्यवस्थित बस्तीमा रहेका वास्तविक भूमिहीन परिवारलाई ती भवनहरूमा स्थानान्तरण गर्ने योजना महानगरले अघि सारेको छ।

बागमती नदी किनारको थापाथली क्षेत्रमा रहेका अनधिकृत संरचना हटाउने कार्य वैशाख १२ गते सम्पन्न भएको थियो। सोअघि महानगरले स्वेच्छिक रूपमा स्थान खाली गर्न सूचित गरेको थियो, जसअनुसार केही परिवारले आफैं घरटहरा हटाएका थिए।

वडा नं. ११ का अनुसार थापाथली र वंशीघाट क्षेत्रमा गरी ३३२ घरटहरा रहेका थिए, जसमा थापाथलीका १३६ संरचना हटाइसकिएका छन् भने वंशीघाटमा १९६ संरचना रहेका छन्। सो क्रममा महानगर प्रहरी बलले सवारी र सामग्री सार्न सहयोग गरेको थियो।

त्यसैगरी बागमती नदी किनारका अन्य क्षेत्रहरू सिनामङ्गलदेखि बानेश्वर, जागृतिनगर, मनोहरा लगायतका क्षेत्रमा पनि हटाउने र व्यवस्थापनको काम क्रमशः अघि बढिरहेको छ। उपत्यका विकास प्राधिकरणका अनुसार विभिन्न वडामा सयौँको संख्यामा अव्यवस्थित बस्तीहरू सार्वजनिक तथा पर्ती जग्गामा रहेको देखिएको छ।

प्रतिवेदनअनुसार उपत्यकाभर करिब ३ हजार ५ सयभन्दा बढी घरधुरी नदी किनार तथा सार्वजनिक जग्गामा अव्यवस्थित रूपमा बसोवास गर्दै आएको अनुमान गरिएको छ। महानगरले ती क्षेत्रहरूको व्यवस्थापन, संरक्षण र दीर्घकालीन समाधानका लागि काम तीव्र बनाइरहेको जनाएको छ।

महानगरका अनुसार खाली गरिएका स्थानहरू पुनः अतिक्रमण हुन नदिन कडा निगरानी र संरचनागत सुरक्षा उपायहरू लागू गरिनेछ।