मालपोत–नापीमा नयाँ नियम: लेखापढी व्यवसायीलाई ड्रेस कोड र रेट कार्ड अनिवार्य

काठमाडौं-  मालपोत तथा नापी कार्यालयहरूमा हुने सेवा प्रवाहलाई व्यवस्थित, पारदर्शी र मर्यादित बनाउन सरकारले नयाँ नियम लागू गर्ने तयारी गरेको छ । भूमि व्यवस्था, सहकारी तथा गरिबी निवारण मन्त्रालयले लेखापढी व्यवसायीहरूका लागि अनिवार्य ड्रेस कोड, परिचयपत्र र रेट कार्ड लागू गर्ने योजना अघि सारेको हो ।

मन्त्रालयले बुधबार लेखापढी व्यवसायीहरूसँग छलफल गर्दै अबदेखि सबै व्यवसायीले स्पष्ट पहिचान खुल्ने परिचयपत्र प्रयोग गर्नुपर्ने, छुट्टै ड्रेस कोड अपनाउनुपर्ने र सेवा शुल्कको दरसूची (रेट कार्ड) अनिवार्य रूपमा सार्वजनिक गर्नुपर्ने व्यवस्था लागू गरिने जनाएको छ ।

मन्त्री प्रतिभा रावलका अनुसार सेवा प्रवाहमा पारदर्शिता कायम गर्न र अनावश्यक शुल्क तथा अनियमितता नियन्त्रण गर्न यो कदम चालिएको हो । उनले मालपोत र नापी कार्यालयमा सेवा लिने नागरिकलाई सहज र व्यवस्थित सेवा उपलब्ध गराउने उद्देश्य रहेको बताइन् ।

यसअघि नै मन्त्रालयले चैत दोस्रो साता मालपोत र नापी कार्यालयहरूमा बिचौलियाको गतिविधि निषेध गर्ने निर्णय गरिसकेको थियो । नयाँ व्यवस्था त्यसैको निरन्तरता भएको बताइएको छ ।