दुई गोलीकाण्डपछि ट्रम्पले बन्द गरिदिए डीभी

काठमाडौं –  अमेरिकी राष्ट्रपति डोनल्ड ट्रम्पले ग्रीन कार्ड चिट्ठा कार्यक्रम, अर्थात् डीभी लटरी स्थगित गरिएको घोषणा गरेका छन्।

यो कार्यक्रम अमेरिकी स्थायी बसोबासका लागि आवेदन दिने अवसर प्रदान गर्ने हो, जसमा ऐतिहासिक रूपमा कम आप्रवासन दर भएका देशका नागरिकहरूलाई प्राथमिकता दिइन्छ। ट्रम्प प्रशासनले सन् २०२७ का लागि डिभी लटरी प्रवेश प्रक्रियामा परिवर्तन गर्ने योजना सार्वजनिक गरेको एक महिनापछि यो निर्णय आएको हो।

अमेरिकी डिपार्टमेन्ट अफ होमल्यान्ड सिक्योरिटीकी मन्त्री क्रिस्टी नोमले उक्त निर्णय ट्रम्पको निर्देशनमा लिइएको र अमेरिकी नागरिकता तथा आप्रवासन सेवालाई कार्यक्रम रोक्न भनिएको बताइन्। नोमले सामाजिक सञ्जाल एक्स मा उल्लेख गरे अनुसार, यही कार्यक्रममार्फत ब्राउन युनिभर्सिटी र एमआईटी गोलीकाण्डका आरोपितहरूलाई अमेरिका आउन अनुमति दिइएको थियो, र यस्तो हिंस्रक व्यक्तिलाई अमेरिका प्रवेश गर्न कहिल्यै दिनु हुँदैनथ्यो।

डीभी लटरीलाई प्रायः ग्रीन कार्ड चिट्ठा भनिन्छ। यसले प्रत्येक वर्ष ५५ हजारसम्म आप्रवासी भिसा उपलब्ध गराउँछ। यी भिसाहरू अमेरिकी आप्रवासन दर कम भएका देशका आवेदकहरूलाई गोलाप्रथा प्रणाली मार्फत वितरण गरिन्छ।

यो निर्णय दुई ठूलो गोलीकाण्डपछि आएको हो। डिसेम्बर १३ मा रोड आइल्याण्डको ब्राउन युनिभर्सिटीमा शरदकालीन सेमेस्टरको अन्तिम परीक्षाको दोस्रो दिन गोलीकाण्ड भएको थियो। एक बन्दुकधारीले स्कूल अफ इन्जिनियरिङमा प्रवेश गरी परीक्षा अगाडिको तयारी सत्रमा गोली चलाउँदा दुई विद्यार्थीको मृत्यु भएको थियो र नौजना घाइते भएका थिए।

त्यसको दुई दिनपछि, डिसेम्बर १५, एमआईटी का भौतिकशास्त्र प्राध्यापक नुनो गोमेस लौरेरोलाई म्यासाचुसेट्सको ब्रुकलीनस्थित उनको घरबाहिर गोली हानी हत्या गरिएको थियो। त्यसपछि एफबीआई र स्थानीय प्रहरीले पाँच दिनसम्म ठूलो खोजी अभियान सञ्चालन गरे। खोजीका क्रममा मास्क लगाएका आरोपित क्लाउडियो भालेन्तेको तस्बिर र भिडियो सार्वजनिक गरिएको थियो। भालेन्ते पछि न्यू ह्याम्पशायरको भण्डारण इकाइभित्र मृत अवस्थामा फेला परेपछि खोजी अभियान समाप्त भएको थियो।