एनपीएलमा चम्किँदैछन् नेपाली खेलाडी

काठमाडौं-  कीर्तिपुरस्थित त्रिवि अन्तर्राष्ट्रिय क्रिकेट रंगशालामा जारी नेपाल प्रिमियर लिग (एनपीएल) मा नेपाली खेलाडीले उत्कृष्ट प्रदर्शन गर्दै टिमलाई जिताउन थालेका छन्। मंसिर १ गतेदेखि सुरु भएको प्रतियोगितामा हालसम्म ११ खेल सम्पन्न भइसकेका छन्। चार खेलमा नेपाली खेलाडीले ‘प्लेयर अफ द म्याच’ घोषणा हुँदै टिमको जित सुनिश्चित गरेका छन्।

पछिल्लो तीन खेलमा लगातार नेपाली खेलाडीले चम्किएका छन्। मंसिर ९ गते काठमाडौँ गोर्खाजका कप्तान करण केसीले ११ बलमा ३४ रन बनाएर र बलिङमा एक विकेट लिएर लुम्बिनी लायन्सलाई २२ रनले हराए। मंसिर ८ गते सुदूरपश्चिम रोयल्सका कप्तान दीपेन्द्रसिंह ऐरीले कर्णाली याक्सविरुद्ध ब्याटिङमा ३९ रन र चार विकेट लिएर टिमलाई ४६ रनले जिताए।

त्यस्तै, विराटनगर किङ्सका कप्तान सन्दीप लामिछानेले जनकपुर बोल्ट्सलाई चार विकेटसहित ९ रनले हराउँदै उत्कृष्ट प्रदर्शन गरे।

विदेशी खेलाडीले पनि शानदार प्रदर्शन देखाएका छन्। पहिलो खेलमा मिलिन्द कुमार, मंसिर २ गते रवी बोपरा, मंसिर ३ गते हर्मित सिंह, मंसिर ४ गते रुबेन ट्रपेलम्यान, मंसिर ५ गते जोश ब्राउन, र मंसिर ६ गते मार्कले टिम जिताउन महत्वपूर्ण भूमिका खेले।

हाल सुदूरपश्चिम रोयल्स लगातार तीन खेल जितेर शीर्ष स्थानमा छन् भने विराटनगर रनरेटको आधारमा दोस्रो छन्। चारमध्ये दुई खेल जितेको काठमाडौँ तेस्रो, तीनमध्ये एक जितेको कर्णाली चौथो, अन्य टिम भने पछि छन्। व्यक्तिगत रूपमा, सर्वाधिक रनकर्ता कर्णाली याक्सका मार्क १४७ रनसहित प्रतियोगिताको एकमात्र शतक हिर्काएका छन् भने बलिङमा सन्दीप लामिछाने सात विकेटसहित शीर्ष स्थानमा छन्।

नेपाल क्रिकेट संघ (क्यान)को आयोजना अन्तर्गत प्रतियोगिता मंसिर २७ गतेसम्म सञ्चालन हुनेछ।