फेरि सक्रिय हुँदै कोरोना: नयाँ भेरियन्टले ट्राभिस हेडदेखि अभिनेत्री शिल्पासम्म संक्रमित

काठमाडौं- कोरोना भाइरसको त्रास विश्वले बिर्सन नपाउँदै यसको नयाँ भेरियन्ट फेरि सक्रिय हुन थालेको छ। हाल हङकङ, सिङ्गापुर हुँदै भारतमा पनि नयाँ संक्रमणका केसहरू देखिन थालेका छन्। मुम्बईमा पछिल्ला तीन महिनादेखि प्रत्येक महिना ७ देखि १० जना कोरोना संक्रमित भेटिन थालेका छन्। त्यहाँको प्रसिद्ध केईएम अस्पतालमा दुई जना कोरोना पोजेटिभ बिरामीको पुष्टि भइसकेको छ। ती दुईमध्ये ५८ वर्षीया महिलाको क्यान्सरका कारण र १३ वर्षीया किशोरीको मिर्गौलाको समस्या कारण मृत्यु भएको अस्पताल प्रशासनले जनाएको छ। यद्यपि, दुवैको मृत्युअघि गरिएको परीक्षणमा कोरोना संक्रमण देखिएको थियो। यसैबीच, आइपीएल खेलमा पनि कोरोना संक्रमण देखिएको छ। सनराइजर्स हैदराबादका ओपनिङ ब्याट्सम्यान ट्राभिस हेड कोरोना संक्रमित भएका छन्। हेड कोच डेनियल भेटोरीले जानकारी दिँदै ट्राभिस हेड भारत फर्किन ढिला भएको पनि बताए। भारत–पाकिस्तानबीचको तनावका कारण आईपीएल स्थगित भएपछि हेड र कप्तान प्याट कमिन्स अष्ट्रेलिया गएका थिए। भारतीय अभिनेत्री शिल्पा शिरोडकर कोरोना भाइरसको संक्रमण भएको छ । उनी आफैँले सामाजिक सञ्जालमा आफू कोरोना संक्रमित भएको बताएकी हुन् । शिल्पाले इन्स्टाग्राममा आफू कोरोना संक्रमित भएको भन्दै सबैलाई सुरक्षित रहन आग्रह गरेकी छिन् । उनले मास्क लगाउन नभुल्नसमेत आग्रह गरेकी छिन् । नयाँ भेरियन्ट कति खतरनाक? सिङ्गापुरमा भेटिएका कोरोना संक्रमितमा मुख्य रूपमा LF.7 र NB.1 भेरियन्ट पाइएको छ, जुन JN.1 स्ट्रेनसँग सम्बन्धित छ। यसको लक्षणमा नाक बग्ने, ज्वरो आउने, घाँटी दुख्ने, खोकि र टाउको दुख्ने मुख्य छन्। हङकङको हेल्थ प्रोटेक्शन सेन्टरका अनुसार, शहरमा कोरोना संक्रमण पुनः तीव्र रुपमा बढिरहेको छ। मे ३ सम्ममा त्यहाँ ३१ जना सक्रिय संक्रमित भेटिएका थिए। त्यहाँका चर्चित पपस्टार ईसान चान पनि कोरोना संक्रमित भएका छन्। सिङ्गापुरमा २८ प्रतिशतले बढे संक्रमणका केस सिङ्गापुरको स्वास्थ्य मन्त्रालयका अनुसार त्यहाँ कोरोना संक्रमण २८ प्रतिशतले वृद्धि भएको छ। र संक्रमितको संख्या १४,२०० पुगेको छ। कमजोर प्रतिरक्षा प्रणाली भएका व्यक्तिहरू बढी प्रभावित देखिएका छन्। चीनमा पनि नयाँ केसहरू भेटिन थालेका छन्। बच्न अपनाउनुपर्ने उपायहरू: -भिडभाड भएका ठाउँमा मास्क अनिवार्य लगाउनुहोस् -हात नियमित रूपमा साबुन वा सेनिटाइजरले धोउनुहोस् -रुघाखोकी वा ज्वरोजस्ता लक्षण देखिएमा घरमै बस्नुहोस् कोरोनाको नयाँ भेरियन्टले विश्वभर पुनः सावधानी अपनाउन जरुरी बनाएको छ। सरकार तथा स्वास्थ्यकर्मीहरू सतर्क रहन र आम नागरिकलाई सावधानी अपनाउन आह्वान गर्दै आएका छन्।