कागजपत्र |
काठमाडौं-प्रधानमन्त्री केपी शर्मा ओलीले आफ्नो मिर्गौला फेल हुनुको मुख्य कारण पञ्चायतकालमा गोलघर जेलमा भोगेको अमानवीय यातना र त्यसपछि लिइएका औषधिको असर रहेको बताएका छन्।
काठमाडौंमा बिहीबार आयोजित ‘नेपाल कुष्ठरोग सम्मेलन’को उद्घाटन सत्रमा बोल्दै प्रधानमन्त्री ओलीले जेल जीवनमा चिसो भुइँमा सुताएर यातना दिइएको, त्यसपछि क्षयरोग (टिबी) र अल्सर जस्ता रोगले ग्रसित भएको र पीडाका लागि बारम्बार पेन किलर सेवन गर्नुपरेको बताए।
“पेटभरी घाउ भएर, भतभत पोल्छ, रगत आउँछ, अनि पेन किलर दिन्छन्। पेन किलर खाँदाखाँदा किड्नी फेल नभएर के हुन्छ?” भन्दै उनले ती सबै स्वास्थ्य समस्याहरूले अन्ततः मिर्गौला फेल गराएको उल्लेख गरे।
प्रधानमन्त्री ओलीले निरोगी नेपाल अभियानअन्तर्गत कुष्ठरोग उन्मूलनलाई सरकारको प्राथमिकतामा राखिने बताउँदै यो प्रयासलाई अझ प्रभावकारी बनाउनुपर्नेमा जोड दिए।
उनका अनुसार अहिले नेपालमा प्रति १० हजार जनसंख्यामा एक जनाभन्दा कम कुष्ठरोगी देखिनु सकारात्मक भए पनि रोग पूर्ण रूपमा निर्मूल नगरेसम्म सन्तुष्ट हुन नसकिने स्पष्ट गरे।
साथै, कुष्ठरोगप्रति सामाजिक चेतना फैलाउनु आवश्यक रहेको बताउँदै उनले रोग लुकाउनु नपर्ने, संक्रमितलाई हेलाँ नगर्नुपर्ने, र कानुनमा आवश्यक संशोधनसहित सरकारले सबैखाले सहजीकरण गर्ने जानकारी गराए।
