सिरहामा पाकिस्तानविरोधी प्रदर्शन, सुदीप न्यौपानेको सम्झनामा जनआक्रोश

सिरहा- भारतीय पर्यटकीय क्षेत्र पहलगाममा चरमपन्थी आक्रमणमा नेपाली युवा सुदीप न्यौपानेको मृत्यु भएपछि सिरहाको गोलबजारमा पाकिस्तानी चरमपन्थवादविरुद्ध तीव्र आक्रोश व्यक्त गरिएको छ। बुधबार धर्मराज हिन्दु सेनाको अगुवाइमा आयोजित प्रदर्शन केवल शोक सभा मात्र नभई, नेपालको विदेश नीति र राष्ट्रहितका विषयमा आम जनताको सचेत आवाज बनेको देखियो।

प्रदर्शनकारीहरूले पाकिस्तानलाई चरमपन्थी संरक्षणको आरोप लगाउँदै विरोध जनाए। नेता कृष्ण गुरागाईं (हनी सिंह) को नेतृत्वमा पाकिस्तानी सेना प्रमुख असीम मुनिरको पुतला जलाइयो, जसले प्रदर्शनको ताप अझै बढायो। ‘आतंकवादसँग सहमति छैन’ भन्ने नारासहित गोलबजार तनावग्रस्त बन्यो।

साथै, विरोधको केन्द्रबिन्दुमा नेकपा एमालेबाट निर्वाचित मेयर श्याम श्रेष्ठको प्रस्तावित ‘नेपाल–पाकिस्तान मित्रता पार्क’ योजना पनि आयो। स्थानीयले राष्ट्रघाती कदम भन्दै त्यसको चर्को विरोध गर्दै तत्काल खारेजको माग गरे। सुदीपको निधनले विदेशमा रहेका नेपालीहरूको सुरक्षाप्रति पनि प्रश्न उठाएको छ।

यो आन्दोलनले एकातिर आतंकको विरोधमा जनमत उकासेको छ भने अर्कातिर राष्ट्रहितविपरीत गरिने कुनै पनि योजना जनताले स्वीकार्दैनन् भन्ने सन्देश पनि दिएको छ।