उच्च अदालत सुर्खेतको गेटमा पेट्रोल छर्केर आत्मदाहको प्रयास, कारण यस्ताे


सुर्खेत— उच्च अदालत सुर्खेतको गेटअघि धर्नामा बसेकी एक महिलासँगै उनकी बहिनीले पेट्रोल छर्केर आत्मदाह गर्ने प्रयास गरेपछि प्रहरीले नियन्त्रणमा लिएको छ ।

श्रीमानको हत्यामा संलग्नहरूलाई अदालतले धरौटीमा छाडेपछि असन्तुष्ट बनेकी जाजरकोट जुनीचाँदे गाउँपालिका–६ की निर्मला शाही न्यायको माग गर्दै अदालत अगाडि धर्नामा बसेकी थिइन् । उनीसँगै रहेकी उनकी बहिनी शर्मिला शाहीले पेट्रोल छर्केर आत्मदाह गर्ने प्रयास गरेपछि प्रहरीले तत्काल हस्तक्षेप गर्दै उनलाई नियन्त्रणमा लिएको हो ।

गत माघ १८ गते रामबहादुर शाहीको हत्या भएको थियो । घटनापछि जाजरकोट प्रहरीले ९ जनालाई पक्राउ गरी कर्तव्य ज्यान मुद्दा दर्ता गरेको थियो । तर, जाजरकोट जिल्ला अदालतले केहीलाई धरौटीमा र केहीलाई साधारण तारिखमा छाडेपछि निर्मलाले उच्च अदालतमा पुनरावलोकनको माग गर्दै धर्ना दिँदै आएकी थिइन् ।

प्रहरीका अनुसार आत्मदाहको प्रयास गर्ने शर्मिलालाई नियन्त्रणमा लिएपछि निर्मला पनि प्रहरी कार्यालय जान सहमत भएकाले उनीहरूलाई कार्यालयमा लगिएको हो । उच्च अदालत सुर्खेतका प्रवक्ता प्रेमप्रकाश थापाले निर्मलाको निवेदन कानुनी प्रक्रियाअनुसार अघि बढाइने जानकारी दिए ।

यस घटनाले कानुनी निर्णयप्रति असन्तुष्टि व्यक्त गर्ने पीडित परिवारहरूको संघर्षलाई फेरि सतहमा ल्याएको छ ।

प्रतिक्रिया