नोबेल अस्पतालको लापरवाहीले बिरामीको मृत्यु भएको भन्दै ५ करोड क्षतिपूर्ति माग

विराटनगर– मोरङको नोबेल मेडिकल कलेजमा चिकित्सकीय लापरवाहीका कारण बिरामीको मृत्यु भएको भन्दै पीडित परिवारले पाँच करोड रुपैयाँ क्षतिपूर्ति माग गर्दै अदालतमा मुद्दा दायर गरेको छ ।

सुनसरी इनरुवाकी ५६ वर्षीया विमला थापा पोखरेल फोक्सो तथा श्वासप्रश्वाससम्बन्धी समस्याका कारण अस्पताल भर्ना भएकी थिइन् । सुधार भएपछि डिस्चार्जको तयारी गरिए पनि ढाड दुखाइ कम गर्न फोक्सो विशेषज्ञ डा. रामहरि घिमिरेले मोर्फिन औषधि सिफारिस गरेपछि उनको अवस्था बिग्रँदै गएको आरोप छ ।

मृतकका श्रीमान् महेश्वर पोखरेलका अनुसार, औषधि सेवनपछि विमलालाई ज्वरो र श्वासप्रश्वासमा समस्या भयो । वार्डमा पटक–पटक अनुरोध गर्दा पनि बेवास्ता गरियो । माघ २१ गते बिहान बेहोस भएपछि उनलाई आइसियूमा राखिएको थियो, जहाँ केही समयपछि चिकित्सकले मृत घोषणा गरे ।

पीडित परिवारले संविधानको धारा ४२ (२), उपभोक्ता संरक्षण ऐनको दफा ३ को ५० र ५१ बमोजिम क्षतिपूर्ति माग गरेका छन् ।

नोबेल मेडिकल कलेजले औपचारिक प्रतिक्रिया नदिए पनि महाप्रबन्धक दिपेश राईले घटनाको छानबिन भइरहेको बताएका छन् ।