यी ९ राजनीतिक दललाई तत्काल नाम फेर्न निर्देशन

काठमाडौं – निर्वाचन आयोगले नौ राजनीतिक दललाई यथाशीघ्र नाम परिवर्तन गर्न निर्देशन दिएको छ । करिब एक वर्षअघि दिइएको निर्देशन पालना नभएको भन्दै आयोगले नौ दललाई नाम परिवर्तन गर्न निर्देशन दिएको हो ।

आयोगका कानुन तथा राजनीतिक दल व्यवस्थापन महाशाखाका अनुसार कानुनले व्यवस्था गरेविपरीत नाम रहेका १९ दलको नाम परिवर्तन गर्नुपर्नेमा ११ दलले अझै नाम परिवर्तन गरेका छैनन् । नेपालको संविधान–२०७२ को धारा २६९ ले राजनीतिक दलसम्बन्धी व्यवस्था गरेको छ । सो व्यवस्था अनुसार कुनै राजनीतिक दलको नाम, उद्देश्य, चिह्न वा झन्डा देशको धार्मिक वा साम्प्रदायिक एकतामा खलल पार्ने वा देशलाई विखण्डित गर्ने प्रकृतिको रहेमा त्यस्तो दल दर्ता हुने छैन ।

आयोगले दर्ता भइसकेका त्यस्ता दलको नाम परिवर्तन गर्न २०८० फागुन ३ गते निर्देशन दिएको थियो । सो निर्णय कार्यान्वयन नभएको भन्दै आयोगले चुरे भावर लोकतान्त्रिक पार्टी, मङ्गोल नेसनल अर्गनाइजेसन, राष्ट्रवादी युवा मोर्चा, शिव सेना नेपाल, मधेश तराई फोरम र अखण्ड सुदूरपश्चिम पार्टीलाई यथाशीघ्र नाम परिवर्तन गर्न निर्देशन दिएको हो । त्यसै गरी मधेशी जनअधिकार फोरम मधेश, खम्बुवान राष्ट्रिय मोर्चाले समेत नाम परिवर्तन गर्नुपर्ने छ ।

आयोगले नाम परिवर्तन गर्नुपर्ने पहिचान गरेको १९ दलमध्ये सङ्घीय खम्बुवान लोकतान्त्रिक पार्टीले राष्ट्रवादी स्वतन्त्र पार्टी नाम राख्न प्रस्ताव गरेको छ । अन्य आठ वटा दलले नाम परिवर्तन गर्ने निर्णय गरिसकेका छन् । तर तराई मधेश लोकतान्त्रिक पार्टीले भने आयोगले नाम परिवर्तन गर्न दिएको निर्देशन संविधानको मर्मविपरीत रहेको भन्दै न्यायालय गुहारेको छ । सो मुद्दामा अन्तरिम आदेश जारी भए पनि निर्णय भइसकेको छैन ।

आयोगले जाति, क्षेत्र, उमेर र सम्प्रदाय लक्षित नाम राख्न नहुने तर्क गर्दै आएको छ । तमलोपाको सो मुद्दा विचाराधीन रहेकै अवस्थामा नाम परिवर्तन नगरेका बाँकी दललाई आयोगले यथाशीघ्र परिवर्तन गर्न पत्राचार गरेको हो । आयोगको कानुन तथा राजनीतिक दल व्यवस्थापन महाशाखाका अनुसार चैत १९ गते नौ वटै दललाई पत्राचार गरिएको समाचार गोरखापत्रमा छापिएको छ ।