गण्डकी प्रदेश प्रमुखले छोरालाई सचिवालयमा नियुक्ति दिएपछि विवाद चुलियो

पोखरा- गण्डकी प्रदेश प्रमुख डिल्लीराज भट्टको सचिवालयमा नियुक्ति गरिएको विषय विवादमा तानिएको छ । उनको प्रमुख स्वकीयसचिवका रूपमा नियुक्त छोरा ज्योति भट्टले नियमित हाजिरी नै नगरिकन सहसचिवसरहको सेवा–सुविधा लिएको आरोप लागेको छ । अख्तियार दुरुपयोग अनुसन्धान आयोगमा परेको उजुरीका कारण यो विषय थप चर्चामा आएको हो ।

ज्योति भट्ट नेपाल उद्योग वाणिज्य महासंघ सुदूरपश्चिम प्रदेशको धनगढीस्थित कार्यालयमा कार्यकारी निर्देशक पदमा कार्यरत थिए । गण्डकी प्रदेश प्रमुख नियुक्त भएपछि डिल्लीराज भट्टले आफ्नै छोरालाई प्रमुख स्वकीयसचिव नियुक्त गरेका थिए । तर, उनी धनगढीमै रहेर सचिवालयबाट पाउने सेवा–सुविधा लिँदै आएको खुलेको छ ।

गत फागुनमा अख्तियारमा परेको उजुरीपछि ज्योतिले १ चैतदेखि लागू हुने गरी पदबाट राजीनामा दिएका थिए । तथापि, प्रदेश प्रमुखको निजी सचिवालयले पठाएको हाजिर प्रमाणपत्रका आधारमा उनले एक वर्षसम्म सेवा–सुविधा लिएको देखिएको छ । उजुरीमा ज्योति भट्टसँगै उपस्वकीय सचिव कुमार तामाङले पनि विनाहाजिरी तलबभत्ता लिएको उल्लेख छ ।

यसैबीच, प्रदेश प्रमुख भट्टको भैँसेपाटीस्थित निजी निवास भाडामा लगाएर घरभाडा उठाएको विषय पनि उजुरीमा समेटिएको छ । अख्तियार दुरुपयोग अनुसन्धान आयोगको पोखरा कार्यालयले गण्डकी प्रदेश प्रमुखको कार्यालयलाई यस सम्बन्धी कागजात उपलब्ध गराउन पत्राचार गरिसकेको छ ।

प्रदेश प्रमुखको कार्यालयका सचिव बद्रीनाथ अधिकारीले सचिवालयका केही कर्मचारीहरूका लागि हाजिर प्रमाणित गरेर सेवा–सुविधा निकासा गरिएको स्पष्ट पारे । उता, नेपाल उद्योग वाणिज्य महासंघ सुदूरपश्चिमका उपाध्यक्ष अनिलकुमार भुजनियाले दोहोरो सेवा–सुविधा लिने काम गलत भएको बताएका छन् ।

आफूमाथि लागेको आरोपबारे बोल्दै ज्योति भट्टले कानुनी प्रक्रियाको पालना गर्ने बताएका छन् । ‘मैले नियतवश होइन, प्रक्रियागत अस्पष्टताका कारण सेवा–सुविधा लिएको हुँ। अब कानुनले जे भन्छ, म त्यसैअनुसार अघि बढ्छु,’ उनले भने ।