च्याउ खाँदा बिरामी परेका १० मध्ये एकको मृत्यु, एक गम्भीर

तनहुँ- तनहुँमा च्याउ खाँदा बिरामी परेकामध्ये एक जनाको ज्यान गएको छ । मृत्यु हुनेमा म्याग्दे गाउँपालिका वडा नं ६ का ६० वर्षीय नारायण मगर छन् ।

उनको पोखरास्थित गण्डकी मेडिकल कलेजमा उपचारकै क्रममा मृत्यु भएको प्रहरीले जनाएको छ । साथै गम्भीर बिरामी परेका ४ वर्षीय बालक सुमित पुलामीलाई थप उपचारका लागि काठमाडौँ लैजाने तयारी छ ।

नारायण र सुमितलाई थप उपचारका लागि शनिबार राति पोखरा ल्याइएको थियो । बाँकी बिरामीको प्रदेश अस्पताल दमौलीमा उपचार भइरहेको प्रहरीले जनाएको छ ।

तनहुँको म्याग्दे गाउँपालिका वडा नं ६ सर्वलाङका नारायण मगरको बारीमा उम्रिएको जंगली च्याउ टिपेर खाँदा १० जना बिरामी भएका थिए ।