एउटै वडामा क्यान्सरका १८ जना बिरामी
कागजपत्र |
दोलखा- पछिल्लो दिनहरूमा वैतेश्वर गाउँपालिकामा क्यान्सर र मिर्गौलाका बिरामीको सङ्ख्या वृद्धि हुँदै गएको छ।
वैतेश्वरमा अघिल्लो वर्षको तुलनामा यस वर्ष क्यान्सर र मिर्गौला पीडित रोगका बिरामी २५.२ प्रतिशतले वृद्धि भएको पाइएको छ ।
गाउँपालिकाको स्वास्थ्य शाखाले दिएको तथ्यांकअनुसार गत वर्ष ४२ जना क्यान्सर र मिर्गौलाका बिरामी रहेको यस वर्ष भने, उक्त सङ्ख्या वृद्धि हुँदै ६० जना पुगेको वैतेश्वर गाउँपालिकाका स्वास्थ्य शाखा प्रमुख बम बहादुर तामाङले बताए ।
पालिकाको वडा नम्बर-८ बाहेक अन्य ७ वटा वडा क्यान्सर र मिर्गौलाका बिरामी रहेको स्वास्थ्य अधिकृत तामाङले बताए । उनका अनुसार वडा नम्बर-६ मात्रै १८ जना क्यान्सर रोगी रहेका छन् ।
गत वर्ष यस वडामा १० जना क्यान्सर रोगी रहेकोमा यस वर्ष उक्त सङ्ख्या बढेर १८ पुगेको वैतेश्वर-६ नाम्दुकि वडा सचिव सीमा लामाले बताइन् ।
त्यसैगरी दोस्रो सबैभन्दा बढी क्यान्सरको बिरामी रहेको वडा नम्बर-४ रहेको छ। अघिल्लो वर्ष १२ जना क्यान्सर संक्रमित रहेको वडा नम्बर-४ यस वर्ष १३ जना रहेको छ।
त्यसैगरी वडा नम्बर-७ मा पनि अघिल्लो वर्षको तुलनामा दोब्बरले क्यान्सर तथा मिर्गौला रोगी बढेका छ। ७ मा गत वर्ष ६ रहेकोमा यस वर्ष संक्रमित बिरामीको सङ्ख्या १२ पुगेको गाउँपालिकाले जनाएको छ।
त्यसैगरी वडा नम्बर-३ मा पनि बिरामीको सङ्ख्या ८ पुगेको छ । गत वर्ष यस वडा संक्रमित बिरामी ३ जना मात्रै रहेका थिए।त्यसैगरी वडा नम्बर-२ मा ४ र वडा नम्बर-१ मा २ जना क्यान्सरको उपचार तथा औषधि खाइरहेका बिरामी रहेको गाउँपालिकाले जनाएको छ।
उपयुक्त खानपिन नमिल्दा क्यान्सर रोग लाग्ने गर्छ।विश्वमा सबैभन्दा धेरै मुत्यु गराउने रोगमध्ये प्रमुख रोग क्यान्सर हो । क्यान्सर बालकदेखि वृद्धसम्म जुनसुकै उमेर समूहलाई लाग्ने रोग हो ।
सरकारले क्यान्सर, डायलासिस, किड्नी प्रत्यारोपण र मेरूदण्डको पक्षघात भएका बिरामीलाई मासिक औषधि उपचार खर्च पाँच हजार रुपैयाँ दिने निर्णयअनुसार पालिकाले उक्त रोगका बिरामीको तथ्याङ्क संकलन गरिरहेको छ ।
