सरकार र एमालेको प्रशंसा गर्दै गगनले भने, ‘महरा पक्राउ पर्नुभएछ, सरकारलाई धन्यवाद’

काठमाडौं – माओवादी केन्द्रका उपाध्यक्ष कृष्ण बहादुर महरालाई पक्राउ गरेपछि कांग्रेस महामन्त्री गगन थापाले सरकारलाई धन्यवाद दिएका छन् ।

सोमबारको प्रतिनिधिसभा बैठकको विशेष समयमा बोल्दै महामन्त्री थापाले महरालाई पक्राउ गरेकोमा सरकारलाई धन्यवाद दिएका हुन् ।

विशेष समयमा बोल्दै महामन्त्री थापाले भने, ‘केही समयअगाडि तत्कालीन प्रतिपक्षी नेकपा एमालेले जोडदार ढङ्गले उठायो । सुन तस्करी प्रकरणमा शक्तिशाली मान्छे संलग्न भएका छन् । त्यसैले प्रहरीको नियमित अनुसन्धानबाट उनीहरूमाथिको छानबिन सही टुङ्गोमा पुग्न सक्दैन ।’

उनले एमालेको पनि प्रशंसा गर्दै तत्कालिन समयमा एमालेले गरेको आशंका सहित भएको पनि बताए । उनले थपे, ‘शक्तिशालीलाई लुकाउने प्रपञ्च भएको रहेछ भन्ने तत्कालीन प्रतिपक्षको आशङ्का सही साबित भयो । आयोगले प्रतिवेदन बुझाएको छ । भर्खर कृष्णबहादुर महरा पक्राउ पर्नुभयो भन्ने हामीले सुन्यौँ । सरकारलाई धन्यवाद छ ।’