दाङमा बस र मोटरसाइकल ठोक्किँदा १ जनाको मृत्यु

घोराही — दाङमा बस र मोटरसाइकल एकआपसमा ठोक्किँदा १ जनाको मृत्यु भएको छ।

मृत्यु हुनेमा मोटरसाइकल चालक रोल्पा रुन्टीगढी गाउँपालिका ३ बस्ने २१ वर्षका चन्द्र बहादुर नेपाली रहेको जिल्ला प्रहरी कार्यालय दाङले जनाएको छ।

प्रहरीका अनुसार विहीबार साँझ करिब ६ बजेतिर घोराही उपमहानगरपालिका १४ स्थित आर्मी ब्यारेक नजिक रा.१ ख १२०१ नम्बरको बस र रा. ३ प ४२ नम्बरको मोटरसाइकल एकआपसमा ठोकिएका थिए।

मोटरसाइकल चालक नेपालीलाई उपचारको लागि राप्ती स्वास्थ्य विज्ञान प्रतिष्ठान घोराही दाङ पठाइएको थियो। उनको उपचारको क्रममा साँझ करिब पौने ७ बजे मृत्यु भएको प्रहरीले जनाएको छ। प्रहरीले बस र बस चालक प्रहरीको नियन्त्रणमा लिएको पनि जनाएको छ।