जसमायाको नाम लिँदै संसदमा भूमिहीनको पक्षमा यसरी गर्जिए कांग्रेस महामन्त्री शर्मा (पूर्णपाठ)
कागजपत्र |
काठमाडौं – संसदको शून्य समयमा कांग्रेस महामन्त्री विश्वप्रकाश शर्माले चार माग गरेका छन् । आइतबार बसेको प्रतिनिधिसभाको बैठकको शुन्य समयमा महामन्त्री शर्माले जग्गाका सम्बन्धमा चार माग राखेका हुन् ।
उनले झापा बुद्धशान्ति गाउँपालिकाकी एक महिलाको भनाई साभार गर्दै नापी कहिले आउँछ र लालपूर्जा कहिले पाइन्छ भन्ने प्रश्नको उत्तर खोजेका छन् ।
शर्माले उक्त अवसरमा सभामुखमार्फत सरकारसँग ४ आग्रह समेत गरेका छन् । उनले नापी नभएको जग्गामा अविलम्ब नापीका लागि माग गरेका छन् भने जनताले तिर्ननसक्ने कर घटाउन समेत माग गरेका छन् । त्यसका साथै कर समायोजनसँगै लालपूर्जा पनि यथाशीघ्र वितरण गर्नुपर्ने जनाएका शर्माले अविश्वस्थित बसोबास र सुकुम्बासी समस्या समाधान गर्ने अन्तिम मिति घोषणा गर्न समेत माग गरेका छन् ।
उनले संसदमा दिएको अभिव्यक्ति
आज शून्य समयमा भुमी बिषय उठाउँदै विश्वप्रकाश शर्मा
… जसमाया केरुङ्ग ……
सम्माननिय सभामुख महोदय,
यो सम्मानित सदनमा मैले अहिले उच्चारण गरेको नाम,
झापा बुद्ध शान्ति गापा, सट्टाभर्नाकी भुँई मान्छे ८० बर्षिया एक आदरणीय आमाको हो l उहाँ जहिल्यै शोध्नुहुन्छ – मैले स्वास फेरिरहेकोे यो एक टुक्रा जग्गाको लालपुर्जा मेरो हातमा कहिले पर्छ ?
*भांगा गोला,
* प्यारिभिट्टा,
* मेची डाँडा,
* टिकापुर
* काली झोडा
* खम्बुटार
* खरे डाँगी
अनि देशको अनेकौं भेगका नागरिक शोधिरहेका छन् –
# नापी कहिले आउँछ ? लालपुर्जा कहिले पाइन्छ ?
बुद्ध शान्ति लगायत कतिपय ठाउँमा सरकारले लालपुर्जा वितरण शुरुपनी गर्यो तर गरीब जनताले चर्को कर तिर्न सक्दैनन् भन्ने हेक्का राखिएन l
त्यसैले सम्माननिय सभामुख मार्फत- म सरकारलाई एकसाथ ४ आग्रह गर्दछु l
एक – नापी नभएको ठाउँमा अविलम्ब नापी शुरु गरियोस् l
दुई – जनताले तिर्न नसक्ने कर घटाएर न्यून बनाइयोस् l
तिन – कर समायोजनसँगै लालपुर्जा वितरण अघि बढाइयोस्
चार – अव्यवस्थित बसोबास र सुकुम्बासी समस्या समाधान गर्ने अन्तिम मितिको सुविचारित घोषणा गरियोस् l धन्यवाद l
जय नेपाल !
