आगलागी पीडित ५ परिवारलाई पुनर्स्थापना गर्ने गाउँपालिकाको निर्णय
कागजपत्र |
खोटाङ – खोटाङको केपिलासगढी गाउँपालिकाले बाक्सिला बजारका आगलागी पिडितलाई तत्काल पुःर्नस्थापना गर्दै राहत प्रदान गर्ने निर्णय गरेको छ । सोमबार साँझ भएको आगलागीबाट विस्थापित भएका बाक्सिला बजारका पाँच परिवारको तत्काल पुनर्स्थापना गर्ने र आवश्यक राहत उपलव्ध गराउने निर्णय गरेको हो ।
घटना लगत्तै गाउँपालिकाका उपाध्यक्ष गुरुराज राईको अध्यक्षमा बसेको बैठकले आगलागी पिडितलाई आगलागी पीडित परिवारहरुलाई लागि क्षतीपूर्ति उपलब्ध गराउन संघीय सरकार, प्रदेश सरकार लगायतका सम्पूर्ण सरकारी तथा गैर–सरकारी निकायलाई अनुरोध गर्ने निर्णय गरेको छ ।
साँझ करिव साँढे पाँच बजे सुरु भएको आगोले व्यवसायी दीपक गुरुङ, रमेश परियार, डिल्लीकुमार श्रेष्ठ र शुभराज राईको घर जलेको हो । बजारका अन्य घरमा आगो फैलिन नदिन स्थानीय अकबर राईको घर जेसिभि र स्काभेटर लगाएर भत्काइएको थियो । गुरुङको घरबाट सुरु भएको आगोले अन्य घर पनि जलाएको हो ।
आगलागीको कारण खुल्न सकेको छैन । क्षतीको विवरण पनि आउन बाँकी रहेको डीएसपी मञ्जिल मुकारुङले बताए । बाक्सिला बजार गाउँपालिकाको केन्द्र हो । अधिकांश जस्ताले छाएको कच्ची घर तथा पसल रहेको बजार आगलागीको उच्च जोखिममा छ ।
