विप्लवद्वारा अध्यादेशको स्वागत, स्वीकृत गर्न राष्ट्रपतिलाई आग्रह

काठमाडौं – विप्लव नेतृत्वको नेकपाले सरकारले ल्याएको ‘मुलुकी फौजदारी कार्यविधि संहिता संशोधन’ अध्यादेशको स्वागत गरेको छ ।

आज (मंगलबार) महासचिव नेत्रबिक्रम चन्द (विप्लव)ले एक विज्ञप्ति जारी गर्दै अध्यादेश स्वीकृत गरी तत्कलीन केपी ओली नेतृत्वको सरकारसँग भएको तीन बुँदे सहमतिलाई लागू गर्ने वातावरण निर्माण गरिदिन राष्ट्रपति विद्यादेवी भण्डारीलाई विशेष आग्रह गरेका छन् ।

‘नेपाल सरकारले हाम्रो पार्टीसँग भएको तीन बुँदे सहमति अनुसार नेता तथा कार्यकर्ताहरु माथि लागेका सम्पूर्ण मुद्दाको खारेजी तथा बन्दी नेता–कार्यकर्ताहरूको रिहाइका लागि मंसिर २५ गतेको मन्त्रपिरिषद्को वैठकवाट अध्यादेशवारे निर्णय गरी प्रमाणीकरणका लागि सम्माननीय राष्ट्रपति समक्ष पेश गरेको छ’, विज्ञप्तिमा भनिएको छ, ‘हाम्रो पाटीसँगको छलफल एवं सहमतिको मर्म अनुरुप सरकारले आफ्नो जिम्मेवारी स्वरुप अध्यादेश पेश गर्नु स्वागतयोग्य कुरा हो । तीन बुँदे सहमतिप्रति हाम्रो पार्टी प्रतिबद्ध रहेको साथै सरकारले पनि समस्याहरुलाई सकारात्मक रुपले निकास दिन गरिरहेको पहललाई मनन् गर्दै संवैधानिक राष्ट्रप्रमुख सम्माननीय राष्ट्रपतिज्यूले पनि अध्यादेशलाई स्वीकृती प्रदान गर्नेमा पार्टी विश्वस्त छ ।’

मंसिर २५ गते (आइतबार) बसेको मन्त्रीपरिषद बैठकल ‘टीकापुर हत्याकाण्ड’मा अदालतले दोषी ठहर गरी जेलमा रहेका नागरिक उन्मुक्ति पार्टीका अध्यक्ष रेशम चौधरीको रिहाइलाई लक्षित गरी फौजदारी कार्यबिधी संशोधन गर्न अध्यादेश जारी गर्ने निर्णय गरेको छ ।

ेअध्यादेशमा मुलुकी फौजदारी कार्यविधि संहिता, २०७४ को परिच्छेद १२ को दफा ११६ लाई संशोधन गर्न प्रस्ताव गरिएको छ । जसमा दफा ११६ को उपदफा ८ पछि ९ थपिएको छ ।