धनराजलाई पद्माको बधाईसहित गुनासो, ‘हामी जनताको मतबाटै पराजित हुन तयार थियौं’

स्याङ्जा — स्याङ्जाको २ नम्बर प्रतिनिधिसभा निर्वाचन क्षेत्रकी पराजित उम्मेदवार पदमाकुमारी अर्यालले निर्वाचित कांग्रेस उम्मेदवार धनराज गुरुङलाई बधाई दिएकी छन् ।

सामाजिक सञ्जाल फेसबूकमा लेख्दै अर्यालले नवनिर्वाचित गुरुङलाई बधाई दिँदै केही गुनासो पनि गरेकी छन् । उनले लेखेकी छन्, ‘श्री धनराज गुरुङजी, स्याङ्जा २ को प्रतिनिधित्व गर्दै प्रतिनिधिसभामा तपाईंको उपस्थिति हुँदै गर्दा तपाईंलाई हार्दिक बधाई छ । म र म आवद्ध पार्टी नेकपा एमालेको तर्फबाट एउटा प्रश्न गरिएको थियो । स्याङ्जा–२ मा जनताले मतदान गर्ने सन्दर्भमा केही बुथ कब्जा भए, पुनः मतदान गरौं । साक्षीका रूपमा कैयौ प्रमाण थिए, भिडियो सार्वजनिक भएकै थियो, मृतक र विदेशमा रहनेका नाममा समेत मतदान गरिएको थियो । हामीले भनेको एउटै कुरा थियो, जनताको मतबाट हामी पराजित हुन तयार छौं । त्यसलाई हामी सहज रूपमा स्वीकार गर्दछौं तर कब्जा गरी खसालिएको मतलाई हामी स्वीकार गर्दैनौं । किनकि लोकतन्त्र र कब्जा आपसमा मेल नखाने विषय हुन् । हाम्रो जायज माग तपाईंले सुन्नुभएन र राज्यबाट समेत पनि सुनुवाइ भएन । खैर तपाईंलाई पुनः बधाई छ ।’

उनले अगाडि लेखेकी छन्, ‘आगामी दिनमा लोकतन्त्रको मूल्यमान्यता तपाईंबाट अपहरित नहोस् । युवाहरूको जोशजाँगरलाई उत्पादनशील एवं सिर्जनशील कार्यमा लगाएर राष्ट्रको सेवक बनाउन सहयोग पुर्‍याउन सक्नुहोस्, न कि निर्वाचनमा आफ्नो स्वार्थ अनुकूल उनीहरूलाई दुरुपयोग गरी प्रतिस्पर्धीमाथि हमला गर्न लगाउँदै, आतंक सिर्जना गरी बुथ कब्जा गर्ने जस्तो दुश्कर्म गर्न नलगाउनुहोस् । मैले तपाईंलाई सालीन एवं लोकतन्त्रमाथि विश्वास गर्ने एउटा नेताको रूपमा बुझेको थिएँ । निर्वाचनका दिन चापकोटको केही बुथमा भएका निर्मम दृश्यले तपाईंप्रतिको मेरो बुझाइ झूटो प्रमाणित गरिदियो । स्वस्थ प्रतिस्पर्धामाथि विश्वास गर्न सक्नुभएन, दर्जनौं प्रमाणहरूले त्यही बताइरहेका छन् ।’

नेत्री अर्यालले सबै कुरा भुलेर जनताको सेवा गर्ने र स्याङ्जाको विकास निर्माणमा सहकार्य गरी अगाडि बढ्न प्रतिबद्ध जनाएकी छन् । ‘हामीले अगाडि बढाएका कैयौ योजनाहरू छन्, तिनलाई पूर्णताः दिन मिलेर अगाडि बढौं, नयाँ थप योजनाहरू आवश्यक छन्, त्यसका लागि हरदम साथ दिन तयार छु । राजनीति पेशा होइन सेवा हो, निरन्तर जनताको बीचमा हुनेछु ।’