क्यामरुनसँगको हारका बाबजुद ब्राजिल समूह विजेता

काठमाडौं –  क्यामरुनसँगको १—० हारका बाबजुद ब्राजिल नकआउटमा समूह विजेताका रूपमा प्रवेश गरेको छ । यसअघि नै नकआउटमा चरणमा प्रवेश गरिसकेको ब्राजिल अन्तिम खेलमा ब्यहोरेको हारका बाबजुद पनि समूह विजेता बनेको हो ।

खेलको इन्जूरी समयमा भिन्सेन्ट अबुबकरले हेडरमार्फत गोल गरी क्यामरुनलाई ठूलो जित दिलाएका हुन् । तर, गोलपछि जर्सी फुकालेका कारण उनले खेलको दोस्रो पहेलो कार्ड पाए र मैदान छाड्न बाध्य रहे । अन्तिम मिनेटमा टिमलाई जित दिलाए पनि क्यामरुन अन्तिम १६ प्रवेश गर्न भने सकेन ।

स्टार स्ट्राइकर ब्रायन एमबुएमोको साथमा क्यामरुनले खेलभर ब्राजिलमाथि दवाव राखेको थियो । तर, लिभरपुलका एलिसनको स्थानमा खेलेका म्यानचेस्टर सिटीका एडर्सनले शानदार बचार गरेका थिए ।

स्वीट्जरल्याण्डले सर्वियालाई पराजित गरेपछि जारी विश्वकपमा कुनै पनि अफ्रिकी टोलीले नकआउट चरणको यात्रा तय गर्न सकेनन् ।

यसअघि नै नकआउटमा स्थान सुरक्षित गरेको ब्राजिलका प्रमुख प्रशिक्षक टिटेले अघिल्लो खेलको टिमबाट १० खेलाडी परिवर्तन गरेका थिए ।

प्रतियोगिताको मुख्य दावेदार ब्राजिल समूह जी को विजेताका रुपमा अन्तिम १६ मा पुगेको छ । उसले क्वाटरफाइनल प्रवेशका लागि दक्षिण कोरियासँग खेल्नेछ ।