रौटहट ३ मा प्रभु शाह कसरी बने गठबन्धनको साझा उम्मेदवार?

काठमाडौँ- नेकपा एमालेको टिकट लिएर स्वतन्त्र उम्मेदवारी दर्ता गराएका प्रभु शाह सत्तारुढ गठबन्धनको साझा उम्मेदवार बनेका छन् । शुक्रवार गठबन्धन दलका शीर्ष नेताहरूले आगामी मंसिर ४ गते हुने प्रतिनिधि सभा र प्रदेश सभा निर्वाचनमा साझा उम्मेदवारहरूकाे नामावली सार्वजनिक गरेका थिए ।

उक्त सूचीअनुसार प्रभु शाह गठबन्धनको साझा उम्मेदवार बनेका हुन् । यद्यपि, रौटहट क्षेत्र नम्बर ३ बाट नेकपा माओवादी केन्द्रका धीरज पटेलले गठबन्धनको तर्फबाट उम्मेदवारी दर्ता गराएका थिए । प्रभु शाहले उनलाई उम्मेदवारी फिर्ता लिएर समर्थन जनाउन आग्रह गरेका थिए । तर, उनले उक्त आग्रह अस्वीकार गर्दै आएका थिए ।

तत्कालीन एमालेका पोलिटब्युरो सदस्य शाहले एमालेबाट प्रतिनिधि सभामा उम्मेदवार बन्ने भन्दै टिकट लिएर गएका थिए । तर, आफूसँगै एकता प्रक्रियाबाट एमालेमा आएका अन्यलाई टिकट नदिइएको भन्दै उनले पार्टीबाट उम्मेदवारी दिएनन् । उनले मधेश प्रदेशका अन्य निर्वाचन क्षेत्रमा पनि आफूनिकट नेताहरूलाई उम्मेदवारी दर्ता गराउन लगाएका थिए । उक्त घटनापछि एमालेले शाहलाई कारबाही गरेको छ ।

एमाले भने उक्त क्षेत्रमा उम्मेदवारविहीन भएको छ ।