कैलालीबाट विप्लव समुहका नगर इन्चार्जसहित तीनजना पक्राउ
कागजपत्र |
धनगढी – कैलालीको टीकापुरबाट नेत्रविक्रम चन्द विप्लव नेतृत्वको नेकपाका नगर इन्चार्जसहित तीनजना नेता-कार्यकर्तालाई शनिबार प्रहरीले
पक्राउ गरेको छ।
विप्लब समुहले आज पक्राउ परेका आफ्ना नेता कार्यकर्ताको रिहाइको माग गर्दै देशभर बन्दको आह्वान गरेको छ । सोही क्रममा प्रहरीले उनीहरुलाई पक्राउ गरेको हो।
ईलाका प्रहरी कार्यालय टीकापुरका प्रहरी नायव उपरीक्षक मधुसुधन न्यौपानेका अनुसार पक्राउ पर्नेमा टीकापुर नगरपालिका एरिया इन्चार्ज पूर्ण खड्का, एरिया सेक्रेटरी जगत विश्वकर्मा र डम्मर बिष्ट रहेका छन् ।
कैलालीमा बन्दको आंशिक प्रभाव परेको छ। प्रहरीले सार्वजनिक सवारी साधनलाई स्कटिङ गरेर गन्तव्यमा पुर्याइरहेको जिल्ला प्रहरी कार्यालय कैलालीले जनाएको छ। धनगढी, अत्तरिया लगायतका बजारहरु भने बन्द रहेका छन् ।
केही दिन अघि प्रतिबन्धित चन्द समुहका नेता धर्मेन्द्र बास्तोला ‘कन्चन’ पक्राउ परेका थिए। प्रहरीको विषेश ब्युरोको टोलीले बास्तोलालाई ललितपुरबाट पक्राउ गरेका थिए । कन्चन केन्द्रीय समिती सचिवालय सदस्य हुन्। उनीसँगै ब्युरो सदस्य विवेक र विशाल पनि पक्राउ परेका थिए । आफ्ना नेता कार्यकर्ता पक्राउ परेछि विप्लव समुहले माघ १० गते (आज)नेपाल बन्द गर्ने घोषणा सहित विज्ञप्ती जारी गरेका थिए ।
