बागी उम्मेदवारले गठबन्धन दलमा हैरानी : कारबाहीको निर्णय होला ?

काठमाडौँ- स्थानीय तह निर्वाचनमा सत्ता गठबन्धनका हेबिवेट उम्मेदवारविरुद्ध विभिन्न ठाउँमा बागी उम्मेदवारी परेको छ। भरतपुर महानगरपालिकामा रेणु दाहालविरुद्ध पूर्वसांसद एवं नेपाली कांग्रेसका नेता जगन्नाथ पौडेलले बागी उम्मेदवारी दर्ता गराएका छन्।

त्यस्तै विराटनगर महानगरपालिकामा उपेन्द्र यादवका छोरा उपमेयरका उम्मेदवार अमरेन्द्र यादवविरुद्ध पनि बागी उम्मेदवारी परेको छ। एकीकृत समाजवादीले पाएको पोखरा महानगरपालिकामा पनि गठबन्धन उम्मेदवारविरुद्ध बागी उठेका छन्। सोमबार बागीहरुले पनि मनोनयन दर्ता गराएका छन्।

महानगरमै बागी उठेपछि सत्ता गठबन्धनका उम्मेदवारलाई चुनौती थपिएको छ। एमालेविरुद्ध जित हासिल गर्न गठबन्धन गरेर चुनावमा होमिएका बेला बागीले चुनौती थपेपछि सोमबार बालुवाटारमा सत्ता गठबन्धनका नेताले अनौपचारिक समीक्षा गरेका थिए।

बैठकमा सहभागी नेकपा एकीकृत समाजवादीका सम्मानित झलनाथ खनालले १६ गतेसम्मको समयलाई सदुपयोग गर्ने निर्णय भएको बताए।

निर्वाचन कार्यक्रमअन्तर्गत उम्मेदवारको विरोधमा उजुरी दिने, मनोनयन पत्र जाँच तथा निर्णय गर्ने, उम्मेदवारको नामावली प्रकाशन र उम्मेदवारले नाम फिर्ता लिने समय वैशाख १६ गते सम्म छ। १६ गते साँझ आयोगले फिर्ता लिएका नाम हटाएर उम्मेदवारको अन्तिम नामावली प्रकाशन गर्नेछन्। जो वैशाख ३० गते हुने निर्वाचनमा आधिकारिक उम्मेदवार हुनेछन्।

गठबन्धनले १६ गते अगावै बागी उठेका नेतालाई कन्भिन्स गरेर विथ ड्र गराउने नीति लिएको हो। नमान्नेलाई पार्टीबाट निष्कासन गर्ने, गठबन्धनको पक्षमा रहेको जनमत भड्काउन नदिने, निरुत्साहित गर्ने गठबन्धनको नीति छ। नेता खनालले बागी दिएकाहरुले पार्टीको निर्णय मान्ने र चुनावी अभियानका क्रममा मिल्ने दाबी गरे। ‘पार्टीभित्र रहेर पार्टी निर्णयको सम्बन्धमा मान्नुपर्छ। नत्र कारवाही हुन्छ,’ उनले भने।

गठबन्धन बैठकमा फिर्ता गराउन प्रयत्न गर्ने कुरा भएको उनले बताए। ‘चुनावी तालमेललाई अगाडि बढाउँछौं। १६ गतेसम्म बागी उम्मेदवार फिर्ता गराउने निर्णय भयो,’ उनले भने।

खनालले बागी फिर्ता गराउन धेरै हदसम्म सम्भव रहेको बताए। ‘पार्टीभन्दा बाहिर गएर स्वतन्त्र रुपले अगाडि बढ्ने सम्भावना हुँदैन। दलभन्दा बाहिरबाट अगाडि बढ्न नसक्ने भएकाले दलको निर्देशन विकल्प छैन। एकआध विचलित होलान,’ उनले भने।

खनालले तालमेलको आधारमा बनेका उम्मेदवारको पक्षमा जनमत बन्ने पनि दाबी गरे। ‘केही अन्तरविरोध भए पनि चुनावी प्रक्रियाका रुपमा समाधान हुँदै जान्छ,’ उनले विश्वास व्यक्त गरे।

नेपाली कांग्रेसका नेता उदयशम्शेर राणाले पनि बागी उम्मेदवारलाई सम्झाएर विथ ड्र गराउन सकिने बताए। ‘सकेसम्म फिर्ता गराउनुपर्छ। सहमति भएका ठाउँमा फिर्ता गराउनुपर्छ। १६ गतेसम्म समय छ। गठबन्धनका सबै पार्टीले प्रयत्न गर्नुपर्छ,’ उनले भने।

निर्वाचनमा धेरै ठाउँमा रुख चिन्ह भएकाले कांग्रेस कार्यकर्ताले इमान्दारितापूर्वक मत हाल्ने उनको भनाइ छ।